«ՀԱՊԿ փոխօգնության փաթեթը ներառում էր եւ սպառազինություն, եւ, ըստ իմ տեղեկությունների, որոշակի ուժերի տեղակայում»,- այսօր խորհրդարանում, լրագրողների հետ զրույցում ասաց «Պատիվ ունեմ» խմբակցության ղեկավար Հայկ Մամիջանյանը՝ հավելելով, որ ինքը մի քանի անգամ է այդ մասին հայտարարել եւ եթե դա այդպես չի` ՀԱՊԿ-ը կարող էր հերքել:
Հիշեցնենք, ավելի վաղ ՀԱՊԿ գլխավոր քարտուղար Ստանիսլավ Զասն էլ էր նման հայտարարություն արել՝ հաստատելով ընդդիմադիր պատգամավորի հայտարարությունները:
Հիշեցնելով, որ Հայաստանը հրաժարվեց ստորագրել ՀԱՊԿ փաստաթուղթը՝ քաղաքական գնահատական պահանջելով, նա ընդգծում է, որ մինչ այդ, ԱԳ նախարարների մակարդակով փաստաթուղթը համաձայնեցվել էր եւ տարակուսում՝ այդ դեպքում ինչո՞ւ ԱԳ նախարարին աշխատանքից չի ազատում, եթե այդքան վատ փաստաթղթի էր համաձայնել:
Անդրադառնալով ՌԴ ԱԳ պաշտոնական ներկայացուցիչ Մարիա Զախարովայի երեկ արած հայտարարությանն էլ եւ թարգմանելով այն դիվանագիտական լեզվից, Հայկ Մամիջանյանն ասաց, որ ռուսաստանցի պաշտոնյան ուղիղ ասաց՝ «Հայաստանն է հրաժարվել Արցախից», այսինքն, «այն տարբերակը, որ «ձեւ չունեինք», չի անցնում. ձեւ կար՝ առնվազն հետագայում ինքնորոշման իրավունքի պահպանման, բայց պաշտոնական Երեւանը դրանից հրաժարվեց, որպեսզի սեփական աթոռը պահի»:
Կարդացեք նաև
«Ես չեմ կարող մանրամասն ասել, թե ինչ ենք անելու: Ես կարող եմ շատ պարզ մի բան խոստանալ. մեր թիմին լռեցնելու համար ինքը երկու տարբերակ ունի՝ բանտարկել կամ սպանել»,-ասաց Հայկ Մամիջանյանը՝ պատասխանելով ընդդիմության անելիքների մասին հարցին եւ հիշեցնելով՝ նախկինում իր հայտնած կարծիքը, որ եթե Նիկոլ Փաշինյանը դեռ իշխանության է՝ ընդդիմությունը վատ է աշխատել, բայց ՀՀԿ-ն ամեն կերպ հասնելու է ՀՀ-ի եւ Արցախի ինքնիշխանության պահպանմանը:
«Վատագույն սցենարի դեպքում, Հայաստանում կարող են լինել երկու խումբ մարդիկ. մարդիկ, որոնք փորձել են հանձնել Արցախը եւ մարդիկ, որոնք չեն կարողացել դրան խանգարել. ես չեմ կարող լինել ոչ առաջին, ոչ երկրորդ խմբում»,- հայտարարեց ընդդիմադիր գործիչը՝ հայտարարելով, որ Նիկոլ Փաշինյանը ՀՀ քաղաքացիներին խաբում է՝ վախեցնելով պատերազմով, որպեսզի իր դավաճանական ծրագրերն իրականացնի:
Ընդդիմադիր գործիչն ընդունում է, որ աշխատելով ուժերի ներածին չափով՝ հաջողության չեն հասել, ուստի պետք է դրանից ավելի աշխատեն՝ հավելելով, որ Հայրենիքի փրկության շարժման եւ Դիմադրության շարժման վերլուծություններն ու հետեւություններն արել են, սխալները չեն կրկնելու: Իսկ այդ սխալների մասին բարձրաձայն խոսելու իմաստը չի տեսնում: Իր գնահատմամբ՝ Նիկոլ Փաշինյանի ու նրա զբաղեցրած աթոռի կաշիներն արդեն միախառնվել են, աթոռից Նիկոլ Փաշինյանին պոկելը բարդ է լինելու. «Բայց մենք պոկելու ենք, պոկելուց վատ չենք»:
«Դուք չեք պատկերացնում, թե ես որքան կուզեի հիմա պիջակով չլինեի, ակցիայի ժամն ու տեղն ասեի, մանդատս էլ ճղեի ու դուրս գայի՝ գնայի միանայի այդ ցույցին: Բայց սա վաղուց արդեն քաղաքական պայքար չէ, հասկանում եմ, որ հարցերը, որպես կանոն տրվում են մեզ, բայց սա բոլորիս պայքարն է»:
Նելլի ԳՐԻԳՈՐՅԱՆ
