ԱԺ-կառավարություն հարց ու պատասխանի ժամանակ ԿԳՄՍ նախարար Ժաննա Անդրեասյանը մանրամասներ ներկայացրեց «Ակադեմիական քաղաքի» ծրագրի մասին։
Նախարարը նշեց, որ ապրիլի վերջին գերմանացի ճարտարապետների կողմից այց է եղել Հայաստան, նրանք այցելել են այն տարածքները, որտեղ պլանավորվում է «Ակադեմիական քաղաքի» կառուցումը։ «Նրանց նախնական ուսումնասիրությունների հիման վրա արդեն ստացել ենք առաջարկը, թե ինչ ժամկետներում կարող են մշակել, այսպես կոչված, գլխավոր հատակագիծը։ Ինչպես գիտեք, մենք գնում ենք փուլային ճանապարհով, առաջին փուլում առաջնահերթ ենք համարել արվեստների կլաստերի կառուցման աշխատանքները։ Այս պահին բանակցում ենք այդ առաջարկը։ Զուգահեռ ձեւավորվել է «Ակադեմիական քաղաք» հիմնադրամը, որը ծրագիրն իրականացնող կառույցն է, այս երկու օրերին կձեւավորվի նաեւ հոգաբարձուների խորհուրդը, որը կառավարելու է հիմնադրամը»,- մանրամասնեց Անդրեասյանը։
Նա նշեց, որ այս փուլում ունեն հստակություն առաջին փուլի աշխատանքների արժեքի մասին, հետագա աշխատանքների արժեքը կախված կլինի առաջին փուլի արդյունքներից։ «Շատ կարեւորում ենք, որ այստեղ ներգրավված է լինելու նաեւ մեր Ճարտարապետաշինարարական համալսարանը։ Եվ տեղում մասնագիտական ռեսուրսի ձեւավորման հնարավորություն ենք ունենալու»,- հավելեց նա։
Կարդացեք նաև
Ռոզա ՀՈՎՀԱՆՆԻՍՅԱՆ
