Ռուսաստանը դիտարկում է Հայաստանի վարչապետ Նիկոլ Փաշինյանի հայտարարությունը որպես դիրքորոշում, որը որդեգրվել է 2022թ. հոկտեմբերի 7-ի գագաթնաժողովի ժամանակ՝ Հայաստանի, Ադրբեջանի, Ֆրանսիայի և ԵՄ ղեկավարության մասնակցությամբ: Այս մասին հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան այսօր տեղի ունեցած ճեպազրույցում՝ մեկնաբանելով Նիկոլ Փաշինյանի հայտարարությունը՝ Արցախն Ադրբեջանի կազմում ճանաչելու մասին:
Զախարովան հիշեցրել է, որ Պրահայում ընդունվել է համատեղ հայտարարություն, որում հղում էր կատարվում 1991թ. Ալմաթիի հռչակագրին, ըստ որի` ԽՍՀՄ հանրապետությունների վարչական սահմանները ճանաչվում են որպես պետական:
«Ինչպես մենք բազմիցս ասել ենք, Պրահայի պայմանավորվածությունները որակապես նոր շրջանակներ տվեցին Բաքվի ու Երևանի միջև բանակցային գործընթացին»,- ասել է Զախարովան:
Նրա խոսքով՝ Փաշինյանի վերջին հայտարարությունները ոչ միանշանակ արձագանք են առաջ բերել Հայաստանում և Լեռնային Ղարաբաղում: Ըստ Զախարովայի, Ռուսաստանի համար՝ որպես բանակցությունների միջնորդի, այս առումով «կարևոր է ունենալ Լեռնային Ղարաբաղի հարցում Հայաստանի հստակ դիրքորոշումը»:
Կարդացեք նաև
«Սա ոչ միայն թեմա է, ոչ միայն հարց է, այլ բազում տարիներ ձգձգվող հակամարտություն: Միջնորդական ջանքեր, որոնք ներդրվել են միջազգային կառույցների և տարածաշրջանային երկրների մակարդակով: Անկասկած, ստորագրված փաստաթղթերով առաջ շարժվելու համար անհրաժեշտ է հասկանալ պետության հստակ դիրքորոշումն այդ հարցում»,- ասել է Զախարովան:
Միաժամանակ, նա նշել է, որ նման հայտարարությունները՝ պետության կառուցվածքի քաղաքական տեսլականի մասին, տվյալ պետության և նրա ժողովրդի առանձնաշնորհն է:
Պատրաստեց Վիկտորյա ԱՆԴՐԵԱՍՅԱՆԸ
