ԱԺ նիստում Վճռաբեկ դատարանի դատավորի թեկնածու ընտրելու հարցի քննարկման ժամանակ «Քաղաքացիական պայմանագիր» խմբակցության պատգամավոր Արման Եղոյանն ընդդիմադիր պատգամավորներին կոչ արեց հարգանքով վերաբերվել դատավորի ինստիտուտին։ «Ներկա թեկնածուներից բոլորը, եթե չեմ սխալվում, գործող դատավորներ են։ Եվ եթե մենք խոսում ենք դատական համակարգի կայացման մասին, ինչը մենք հիմա փորձում ենք անել, նախ եւ առաջ հարգանքով պետք է վերաբերվենք այդ ինստիտուտին եւ ոչ թե մեր ինչ-ինչ քաղաքական նկատառումներ այստեղ բերենք, սարքենք քաղաքական շահարկման թեմա»,- ասաց Եղոյանը։
Նրա խոսքով՝ եղել են ժամանակներ, երբ շատ մեծ է եղել քաղաքական իշխանության ազդեցությունը դատական համակարգի վրա։ «Եվ, այո, մենք հիմա փորձում ենք կամաց-կամաց վերացնել այդ ազդեցությունը։ Եվ ինչպես դուք տեսնում եք, վերջին 5 տարիների ընթացքում բազմաթիվ դեպքերով դատավորները կայացրել են որոշումներ, որոնք ակնհայտ է, որ միգուցե դուր չգային գործող իշխանություններին, բայց այդ որոշումները կայացվել են, այդ վճիռները կայացվել են։ Ես չեմ կարծում, որ ձեր մատնանշած ժամանակներում նման որոշումների կայացումը հնարավոր կլիներ ընդհանրապես»,- հավելեց Եղոյանը։
Ռոզա ՀՈՎՀԱՆՆԻՍՅԱՆ
