Քանի դեռ գնված բնակարանը շահագործման չի հանձնվել, բնակարանի վկայականը չի տրամադրվել, դրա դիմաց վճարված գումարի 75 տոկոսը պետք է սառեցված լինի: Այս մասին մայիսի 23-ին ԱԺ նիստում ասել է «Քաղաքացիական պայմանագիր» խմբակցության պատգամավոր Գեւորգ Պապոյանը «Հայաստանի Հանրապետության քաղաքացիական օրենսգրքում փոփոխություններ կատարելու մասին» օրենքի նախագծի զեկուցման ընթացքում:
«Ստեղծվել է իրավիճակ, երբ ՀՀ քաղաքացիները բնակարաններ են գնում, կառուցապատողներն ու բանկերը պայման են առաջարկում նրանց, որը ռիսկեր է պարունակում: Ենթադրենք՝ նորակառույց շենքի դեռեւս 4 հարկն է կառուցված, մարդն 8-րդ հարկում գնում է բնակարանի գնման իրավունք: Տնտեսական ցնցումների, անշարժ գույքի շուկայում գների անկման կամ այլ իրավիճակներում կառուցապատողի ֆինանսական վիճակն էականորեն կարող է վատթարանալ ու շենքի շինարարությունը կանգնել: Կստացվի՝ մարդը գնման իրավունքի գումարը տվել է, բայց շենքը չկա: Օրենսդրական նախաձեռնությունը միտված է նման ռիսկերից խուսափելուն»,- ասել է Գեւորգ Պապոյանը:
Գեւորգ Պապոյան
Պատգամավորը հիմնավորել է, թե ինչով է պայմանավորված իր նշած 75 տոկոսը: «Եթե կառուցապատողի ֆինանսական վիճակը վատթարանա ու այլեւս ի վիճակի չլինի շարունակել շինարարությունը, գնման պայմանագիր ունեցողների՝ բանկում 75 տոկոս սառեցված հաշիվների միջոցով շինարարությունն ավարտին հասցնել հնարավոր կլինի»:
Պատգամավորը նշել է նաեւ, որ վերոնշյալ 75 տոկոսները բանկում ավանդային գումարներ են լինելու, որոնց տոկոսային գումարները կառուցապատողը կկարողանա օգտագործել:
Կարդացեք նաև
Հարակից զեկույցով հանդես է եկել Ֆինանսավարկային եւ բյուջետային հարցերի մշտական հանձնաժողովի անդամ Նարեկ Գրիգորյանը:
«Թող ներեն ինձ բոլոր կառուցապատողները. այդքան ցավ չեմ զգա, եթե օրենքի նախագծի ընդունման արդյունքում մի 3-4 կառուցապատող շուկայից դուրս մնա, բայց վատ կզգամ ինձ, եթե տեսնեմ՝ ՀՀ 400-500 քաղաքացի Կառավարության դիմաց բողոքում է, որ իրենց բնակարանները չկան»,- նշել է պատգամավորն ու հայտնել, որ նախագիծը քննարկվել է հանձնաժողովում ու ստացել դրական եզրակացություն:
Խաչատուր Սուքիասյան
«Քաղաքացիական պայմանագիր» խմբակցության պատգամավոր Խաչատուր Սուքիասյանն էլ նշել է, որ բազմաբնակարան շենքերի թույլտվություններն ուշացնում են, շղթան դանդաղում է, ինչը բերում է գների բարձրացման: Պատգամավորը հետաքրքրվել է՝ այս հարցը քննարկվե՞լ է հանձնաժողովում, ինչին ի պատասխան՝ Նարեկ Գրիգորյանն ասել է, որ ինքն էլ է վերահաստատում՝ խնդիրը կա, բայց այն հանձնաժողովում չի քննարկվել:
«Քաղաքապետարանին պետք է խնդրենք ու հորդորենք, որ շինթույլտվությունների տրամադրումն արագ կատարեն, որ բնակարանների գներն անսպասելի ու արագ չբարձրանան»,- ասել է Նարեկ Գրիգորյանը:
Վահան Քերոբյան
Հարակից զեկուցող, Էկոնոմիկայի նախարար Վահան Քերոբյանն էլ նշել է, որ օրենքի նախագիծը կառուցապատման ոլորտում ավելորդ ռիսկեր չի առաջացնում, այն հավասարակշռված է:
ԱԺ հաղորդագրություն
