Մայիսի 9-ին «Բացում» նախաձեռնության կողմից կազմակերպած «Կանգնենք Արցախի գյուղերի կողքին» միջոցառման և մի քանի կազմակերպությունների և սրտացավ անհատների շնորհիվ հավաքված գումարով գնեցինք դեղորայք և կարողացանք ուղարկել երկկողմանի շրջափակման մեջ գտնվող Շուշիի շրջանի Հին Շեն համայնք:
Այդ համայնքի բնակիչները էլ ավելի դժվար իրավիճակում իրենց կրկին հիշված և կարևորված զգացին: Նրանք իրենց հարգանքն ու շնորհակալությունն են հայտնում ներդրում ունեցած բոլոր մարդկանց: Ասում են ՝ միասնությունն ու բարությունն է հաղթելու, պետք է ամուր մնանք:
Եվս մեկ անգամ շնորհակալություն ենք հայտնում սցենարիստ, կատակերգու, դերասան Վարդան Պետրոսյանին, ֆոլկ երգչուհի և «ԲԱՑՈՒՄ» նախաձեռնության անդամ Անուշիկ Հարությունյանին, դաշնակահար, կոմպոզիտոր Սարգիս Ադամյանին, «Իլիկ» սրճարանի հիմնադիր տնօրեն Անահիտ Սահակյանին, ռեժիսոր և «Արցախի ծանրաձողը» նախաձեռնության հեղինակ Գարիկ Հովհաննիսյանին, «Լևոն և Լամարա» դեղատուն ՍՊԸ-ին:
Ինչպես նաև շնորհակալ ենք բոլոր օժանդակողներին, որոնք իրենց ներդրումն ունեցան փոքր թվացող, բայց իրականում մեծ և կարևոր նշանակություն ունեցող գործում:
Կարդացեք նաև
Այս ամենի հետ հիշում և հիշեցնում ենք նաև, որ Արցախի հակամարտությունը ոչ միայն տարածաշրջանային, այլ նաև միջազգային խնդիր է։ Ինքնորոշման և տարածքային ամբողջականության հարգման սկզբունքները պետք է պահպանվեն, և այդ սկզբունքների ցանկացած խախտում պետք է դատապարտվի:
Մենք շարունակում ենք հավատարիմ մնալ մեր նպատակներին և սկզբունքներին, շարունակում ենք պայքարել Բերձորի միջանցքի բացման և Արցախի քաղաքացիների իրավունքների համար: Հրավիրում ենք բոլորին՝ կազմակերպություններին, անհատներին, միջազգային հանրությանը, միանալ մեզ՝ կանգնելու Արցախի քաղաքացիների կողքին:
«Բացում» նախաձեռնություն
