«Եթե հիշում եք, վերջին 3 տարիներին, անցած տարի հենց այս օրերին այս վտանգների մասին մենք բարձրաձայնել ենք: Ըստ էության, Նիկոլ Փաշինյանը վերջին օրերին հրապարակել է Արցախը եւ Հայաստանը հանձնելու ճանապարհը եւ ժամանակացույցը: Ըստ էության՝ ՀՀ բոլոր քաղաքական ուժերը, հայ ժողովուրդը, մտահոգ քաղաքացիները ունեն ընդամենը 5-6 ամիս երկիրը հանձնելու գործընթացը կասեցնելու համար»,- այսօր խորհրդարանում լրագրողների հետ զրույցում ասաց «Հայաստան» խմբակցության պատգամավոր, ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը:
Լրագրողների հարցերը վերաբերվում էին Նիկոլ Փաշինյանի երեկ արած այն հայտարարությանը, որ Հայաստանը պատրաստ է ճանաչել Ադրբեջանի տարածքային ամբողջականությունը եւ «86.6 հազար քառակուսի կմ–ն ներառում է նաև Լեռնային Ղարաբաղը: Բայց նաև պետք է արձանագրել, որ մենք ասում ենք, որ Լեռնային Ղարաբաղի հայության և իրավունքների, անվտանգության հարցը պետք է քննարկվի Բաքու–Ստեփանակերտում ձևաչափում», ինչպես նաեւ ընդդիմության հակաքայլերին:
Իշխան Սաղաթելյանի տպավորությամբ, մայիսի 25-ին Մոսկվայում՝ Փաշինյան-Ալիեւ-Պուտին հանդիպումից հետո հանդես կգան եռակողմ ինչ-որ հայտարարությամբ, որից հետո այդ ամեն ինչը կշարունակվի Քիշնևում, այնուհետև Բրյուսելում, Նիկոլ Փաշինյանը կփորձի պայմանավորվել կապիտուլյացիայի նոր պայմանագրի շուրջ. «Հոկտեմբերի հանդիպման մասին ևս հայտարարվել է, կփորձեն ունենալ ամբողջական կապիտուլյացիայի պայմանագիր, այնուհետև այն կվավերացնեն»:
Ընդդիմության անելիքների մասին էլ Իշխան Սաղաթելյանն ասաց՝ չեն համակերպվելու ստեղծված իրավիճակի հետ, պայքարելու են մինչեւ վերջին շունչը. «Այն բոլոր խոսակցությունները, թե ընդդիմությունը հեռացել է իր օրակարգից, պայքարը դադարեցրել է, ես ձեզ վստահեցնում եմ, որ այդպես չի լինելու»: Նա պնդում է՝ Դիմադրության շարժումն եւ անցած տարվա պայքարի փուլը հետաձգել է Փաշինյանի այսօրվա սկսած գործընթացները եւ հավելում, որ առաջիկայում՝ Հայաստանում եւ Սփյուռքում համախմբելու են ժողովրդին, դուրս են բերելու պայքարի:
Կարդացեք նաև
Իր գնահատմամբ, Նիկոլ Փաշինյանի ասուլիսում հնչեցրած դիրքորոշումները ՀՀ պետականության գոյությունը դնում են վտանգի տակ:
Մանրամասները՝ տեսանյութում
Նելլի ԳՐԻԳՈՐՅԱՆ
