«Մի առիթով Մոսկվայի եւ համայն Ռուսիո պատրիարք Կիրիլն ասել է՝ Աստված իշխանության մեջ չէ, այլ ճշմարտության: Մեր ճշմարտությունը մեկն է՝ 1991 թվականի դեկտեմբերի 10-ին, ԽՍՀՄ պաշտոնական անկումից ընդամենը մի քանի օր առաջ, ԼՂՀ ժողովուրդը հանրաքվեով իրացրեց եւ ամրագրեց անկախ պետություն ունենալու իր իրավունքը: Ավելի վաղ, 1991 թվականի սեպտեմբերի 2-ին, ԼՂ մարզային եւ Շահումյանի շրջանային խորհուրդների համատեղ նիստում ընդունվել է ԼՂՀ կազմավորման հռչակագիրն, ինչը համապատասխանում էր թե ԽՍՀՄ օրենսդրության նորմերին, թե միջազգային փաստաթղթերում ամրագրված ինքնորոշման իրավունքին»,-այսօր Արցախի խորհրդարանի արտահերթ նիստում հայտարարեց ԱՀ խորհրդարանի նախագահ Արթուր Թովմասյանը:
Արցախի խորհրդարանի արտահերթ նիստում ներկա էր 30 պատգամավոր, նիստը հրատապ հարցերի շուրջ էր, մասնավորաբար, այսօր կայացած ասուլիսում ՀՀ վարչապետ Նիկոլ Փաշինյանի արած հայտարարության:
Արթուր Թովմասյանը նկատեց՝ անտեսելով ու զրոյացնելով ԼՂՀ անկախության Հռչակագիրը, ՀՀ վարչապետը հայտարարել է՝ «86.6 հազար քառակուսի կմ–ն ներառում է նաև Լեռնային Ղարաբաղը: Բայց նաև պետք է արձանագրել, որ մենք ասում ենք, որ Լեռնային Ղարաբաղի հայության և իրավունքների, անվտանգության հարցը պետք է քննարկվի Բաքու–Ստեփանակերտում ձևաչափում»:
«Ի՞նչ իրավունքների, անվտանգության եւ երկխոսության մասին կարող է խոսք լինել, երբ Ադրբեջանն Արցախը 162 օր պահում է շրջափակման մեջ՝ շարունակելով դեռ 1980-ականներից սկսած Արցախի էթնիկ զտման եւ ցեղասպան քաղաքականությունը»,- հարցադրում արեց Արթուր Թովմասյանը՝ կոչ անելով աշխարհասփյուռ հայությանը, Արցախի ճակատագրով մտահոգ հասարակությանը՝ սատար կանգնել արցախահայության՝ իր հայրենիքում ապրելու եւ արարելու կամքին:
Կարդացեք նաև
«Հարգելի պատգամավորներ, մենք այլեւս ժամանակ չունենք, յուրաքանչյուր վայրկյանը թանկ է մեր ապագան փրկելու համար, յուրաքանչյուր պատգամավոր ասելիք ու անելիք ունի այս ծանր ժամանակահատվածում. հայրենիքին ծառայելը պարտք է, հայրենիքը պաշտպանելը՝ մասնագիտություն:
Աստված զորավիգ ՀՀ եւ ԱՀ հանրապետություններին»,- իր խոսքը եզրափակեց Արցախի ԱԺ նախագահը:
Նելլի ԳՐԻԳՈՐՅԱՆ
