Ի պաշտպանություն հերոսածին մայր Գայանե Հակոբյանին անհապաղ ազատ արձակելու նստացույցի մասնակից զոհվածի հայր Արա Ռոստոմյանը անդրադառնալով այսօրվա ասուլիսում որդու առեւանգման մասին Նիկոլ Փաշինյանի արած հայտարարությանը, ասաց․ «Ինչ վերաբերում է առեւանգման փաստին, եկեք տրամաբանորեն մոտենանք։ Ասում է՝ առեւանգել են։ Նախ, ինքը մեքենայում նստած էր մեկ կնոջ հետ՝ չափերով իրենից փոքր, տարիքով՝ իրենից մեծ։ Եթե մի պահ ենթադրենք, որ գնալու էին Եռաբլուր։ Չէ՞ որ այնտեղ պետք է իջնեին մեքենայից ու ոտքով քայլեին։
Եռաբլուրում շուրջօրյա ոստիկանական համակարգ է գործում, ու նույն Աշոտ Փաշինյանին բոլորը ճանաչում են։ Այսինքն, եթե ինքը վախ ուներ, կարող էր հասնել Եռաբլուր եւ ոստիկաններին ասեր, որ իրեն փորձում են առեւանգել, կամ կյանքին վտանգ է սպառնում ու չգիտեմ, թե էլի ինչ կարող էր ասել։ Այս առումով, ես չեմ ընդունում այդպիսի պատասխան, թե իրոք առեւանգվել է։ Ես գործի հանգամանքներին որքան ծանոթացա, այս փաստը որեւէ մեկը հաշվի չի առել։
Եթե իրենց ասելով առեւանգվել էր, մեքենան կարմիր լույսի տակ կանգնած ժամանակ կարող էր իջնել։ Այստեղ ավելի շատ միտում եմ տեսնում ու պլանավորած գործողություն։ Իսկ այն, որ Նիկոլ Փաշինյանը հավաստիացնում է, թե գործի ընթացը օբյեկտիվ է լինելու, եթե օբյեկտիվ գործընթաց լիներ, նկատի ունեմ սեպտեմբերի 21-ի գործը, մենք որեւէ հայտարարություն չէինք անի, որ մեր պայքարի ձեւը փոխում ենք։ Այսինքն, եթե իրավական դաշտը օբյեկտիվ գործեր, այսօր այստեղ չէինք գտնվի եւ Գայանեն էլ մեր կողքը կլիներ։ Այդ առումով չեմ վստահում օբյեկտիվ քննությանը, որովհետեւ մենք ամեն ինչը ինքներս ենք տեսել։ Այնպես որ, Նիկոլ Փաշինյանը դա ասել է ասելու համար»։
Կարդացեք նաև
Aravot.am-ի հարցին, թե առեւանգումը բռնության հետքեր չի՞ ենթադրում, Արա Ռոստոմյանը պատասխանեց․ «Ես իրավաբան չեմ, չեմ կարող ասել։ Բայց առեւանգումը ինչպե՞ս է լինում։ Դա փաստաբանները պետք է ներկայացնեն։ Տեսաերիզը կա։ Ինքն իր կամքով գնում, դուռը բացում, նստում է, մյուս կողմից Գայանեն է նստում։ Գայանեն դռները չի արգելափակել, որ չկարողանա դուրս գալ։ Այնպես որ, երբ համադրում ենք փաստերը, պարզ է լինում, որ սա առեւանգում չէ»։
Աշոտ ՀԱԿՈԲՅԱՆ
