«Անկլավների հարցը նոր չէ, 1999 թվականի բանակցային փաթեթներում կա»,- այսօր հրավիրած ասուլիսում ասաց վարչապետ Նիկոլ Փաշինյանը։ Նա նշեց, որ այնպես չէ, որ այդ հարցը կառավարությունը նոր է առաջ բերել։ «Մենք ընդհանրապես բարեբախտաբար, թե դժբախտաբար, ոչ մի նոր հարց օրակարգ չենք բերել։ Ինչ խոսում ենք, միշտ եղել են օրակարգում։ Անկլավների հարցի լուծման այն տարբերակը, որը ես ասացի, այն ժամանակ էլ է այդ տարբերակը եղել շրջանառության մեջ։ Եվ հայկական կողմի համար ոնց որ թե ընդունելի է եղել»,- ասաց նա։
2021 թվականի դեկտեմբերին Նիկոլ Փաշինյանը հայտարարել էր, որ անկլավների հետ կապված իրավական որեւէ հիմք գոյություն չունի։ Հարցին, թե հիմա իրավական հիմքերը գտնվե՞լ են, Փաշինյանը պատասխանեց․ «Իրավական հարցերը պետք է ճշգրտվեն, որովհետեւ դրանք բարդ թեմաներ են, ինչ ասում եմ, հետո պետք է գնանք, դրանց իրավական հիմնավորումները տանք։ Եթե իրավական հիմնավորումներ չտանք, այդ քաղաքական հայտարարությունները կմնան քաղաքական հայտարարություններ։ Հանրագիտարանային, աշխատանքային քարտեզների, հողի վրա գտնվելու իրողությունների մակարդակով դա եղել է, բայց ինչ էլ պայմանավորվենք, պետք է իրավական ձեւակերպում ստանա»։
Ռոզա ՀՈՎՀԱՆՆԻՍՅԱՆ
