«Հայաստանի դատական օրենսգիրք» սահմանադրական օրենսգրքի 150 հոդվածի առաջին եւ երկրորդ մասի համաձայն՝ «Դատավորին կարգապահական պատասխանատվության ենթարկելու հարցը Բարձրագույն դատական խորհուրդը քննում է կարգապահական պատասխանատվության ենթարկելու մասին միջնորդությունն ստանալու պահից մեկամսյա ժամկետում:
Բացառիկ դեպքերում դատավորին կարգապահական պատասխանատվության ենթարկելու հարցի քննության ժամկետը Բարձրագույն դատական խորհրդի հիմնավորված որոշմամբ կարող է ոչ ավելի, քան մեկ ամսով երկարաձգվել, իսկ փորձաքննություն նշանակվելու դեպքում՝ փորձաքննության կատարման համար անհրաժեշտ ժամկետով»: Իսկ 84 հոդվածի 11 կետի համաձայն. «Բարձրագույն դատական խորհրդի նախագահը հրավիրում եւ վարում է Բարձրագույն դատական խորհրդի նիստերը, ստորագրում է Բարձրագույն դատական խորհրդի որոշումները, ներկայացնում է Բարձրագույն դատական խորհուրդն այլ մարմինների հետ հարաբերություններում, ինչպես նաեւ իրականացնում է Բարձրագույն դատական խորհրդի բնականոն գործունեության ապահովմանն ուղղված այլ լիազորություններ»:
Որքան ծանոթանում եմ վարույթները հետաձգելու մասին որոշումներին, այնքան համոզվում, որ ժամկետների խախտման մասին որեւէ հիմնավորում չկա:
Հունիսի 1-ին, օրինակ, նշանակվել է Երեւան քաղաքի քաղաքացիական դատարանի դատավոր Ռուբեն Բունիաթյանի նկատմամբ կարգապահական վարույթ հարուցելու մասին գործով նիստը: Միջնորդությունը Բարձրագույն դատական խորհուրդ է ներկայացրել ՀՀ արդարադատության նախարարի պարտականություններն այդ ժամանակ կատարող Արմենուհի Հարությունյանը: Խոսքն այս տարվա ապրիլի 19- ի ԲԴԽ դիմելու 29 Ա որոշման մասին է: Իսկ արդարադատության նախարարին դիմել էր քաղաքացի Կ. Պողոսյանն այս տարվա փետրվարի 9-ին…
Կարդացեք նաև
Մայիսի 29-ին Բարձրագույն դատական խորհրդում՝ ԲԴԽ-ում կլսվի Գեղարքունիքի մարզի դատավոր Դավիթ Սարգսյանի եւ Երեւան քաղաքի քաղաքացիական դատարանի դատավոր Մուրադ Հովակիմյանի գործերով ՀՀ արդարադատության նախարարի միջնորդության քննությունը, նրանց կարգապահական պատասխանատվության ենթարկելու վերաբերյալ:
Դ. Սարգսյանի գործով ԲԴԽ-ն մեկ անգամ՝ մայիսի 8-ին արդեն իսկ հետաձգել էր, այն նշանակելով մայիսի 15-ին: Պաշտոնական կայքում 8-ի որոշումից հետո չկան մայիսի 15-ի որոշումներն այն մասին, թե նիստերը ինչու են հետաձգվել եւ նշանակվել երկու շաբաթ հետո ժամանակացույցով:
Նշեմ, որ կարգապահական վարույթ հարուցելու հիմք էր հանդիսացել անցյալ տարվա դեկտեմբերի 23-ին գլխավոր դախախազ Ա. Վարդապետյանի կողմից ԱՆ պարտականությունները կատարողին ուղղված հաղորդումը: Իսկ այդ ժամանակ նախարարի պարտականությունները կատարել է Արմենուհի Հարությունյանը:
Այս տարվա մարտի 14-ին թիվ 17 Ա որոշմամբ հարուցվել էր վարույթ:
Դատավոր Մուրադ Հովակիմյանի գործով 2022թ. նոյեմբերի 18-ի գրությամբ ԱՆ-ին վերահասցեագրված դիմումով դիմել էր Կարեն Կիրակոսյանի ներկայացուցիչ Նորայր Յուզբաշյանը: Դեկտեմբերի հինգին ներկայացվել է նախարարին զեկուցագիր:
Միայն այս տարվա մարտի 23-ին ԱՆ նախարարի որոշմամբ դատավորի նկատմամբ հարուցվել է կարգապահական վարույթ: Ապրիլի քսանին հետեւել է միջնորդություն ԲԴԽ ուղարկելու գործընթացը՝ որոշումը:
Ռուզան ՄԻՆԱՍՅԱՆ
Հ.Գ.-ԲԴԽ պաշտոնական կայքից տեղեկացա, որ 2023-ին դատավորների նկատմամբ «վերջին» որոշումը կայացվել է այս տարվա մարտի 20-ին:
«Առավոտ» օրաթերթ
20.05.2023
