Մոսկվան մշտապես կնպաստի, որպեսզի Հարավային Կովկասում իրավիճակի կայունացման պայմանավորվածությունները կատարվեն: Այս մասին հայտարարել է Ռուսաստանի արտգործնախարար Սերգեյ Լավրովը Մոսկվայում Հայաստանի և Ադրբեջանի արտգործնախարարներ Արարատ Միրզոյանի և Ջեյհուն Բայրամովի հետ հանդիպմանը:
«Մենք ամեն կերպ կհասնենք նրանք, որ իրավիճակի կայունացմանը վերաբերող որոշումները կատարվեն,- ասել է Լավրովը: – Ակնկալում ենք, որ դրանք կհարգեն նաև մյուս երկրները, որոնք այս կամ այն կերպ շահագրգռված են այս տարածաշրջանում ներկայությամբ»:
Լավրովը նշել է, որ Հայաստանի, Ադրբեջանի և Ռուսաստանի ղեկավարների ստորագրած եռակողմ հայտարարություններում կա ճանապարհային քարտեզ՝ կայուն լուծումների հասնելու համար:
«Մենք, վերլուծելով Հարավային Կովկասի շուրջ իրավիճակը, կարծում ենք, որ մեր առաջնորդների պայմանավորվածություններին այլընտրանք չկա, […], մենք լիարժեք շահագրգռված ենք, որպեսզի այս տարածաշրջանում լինի կայունություն, լինի խաղաղություն, այստեղ ուղղակիորեն միահյուսվում են Ռուսաստանի շահերը»,- ասել է Լավրովը:
Կարդացեք նաև
Նա նաև ընդգծել է, որ Ղարաբաղում և սահմանին իրավիճակի կայունացմանը զուգահեռ անհրաժեշտ է լուծումներ փնտրել մարդասիրական խնդիրների, տնտեսական, տրանսպորտային կապերի ապաշրջափակման համար: «Եվ, իհարկե, խաղաղության պայմանագրի տեքստի համաձայնեցումը, որի շուրջ դուք ակտիվորեն աշխատում եք»,- ասել է Լավրովը:
Պատրաստեց Վիկտորյա ԱՆԴՐԵԱՍՅԱՆԸ
