Այն մարդիկ, ովքեր լավ են ճանաչում Եվրոպական միության պատվիրակության ղեկավար, դեսպան Անդրեա Վիկտորինին՝ տեղյակ են, որ նրա սրտում Սյունիքի համար շատ ջերմ անկյուն կա։ Այս մասին Կապանում՝ մայիսի 18-ին, Եվրոպայի օրվան նվիրված ասուլիսում հայտարարեց տիկին դեսպանը։ Հենց սկզբում նա հայտարարեց, որ Եվրամիության կողմից Սյունիքի մարզին հատկացված 51 մլն եվրո աջակցության չափը փոխվել է։
Հիշեցնենք, այս տարվա հունվարին մեկնարկած «Դիմակայուն Սյունիք Թիմ Եվրոպա նախաձեռնությունը» Եվրոպական միության, Եվրոպական ներդրումային բանկի, ԵՄ անդամ երկրների՝ Ավստրիայի, Ֆրանսիայի, Գերմանիայի, Լեհաստանի, Շվեդիայի, ինչպես նաեւ գործընկեր հանդիսացող Շվեյցարիայի համատեղ նախաձեռնությունն է։ Գումարները ուղղվելու են Սյունիքի ենթակառուցվածքների զարգացմանը, փոքր ու միջին բիզնեսի աջակցմանը, ինչպես նաեւ դրամաշնորհային ծրագրեր են իրականացվելու։
Կարդացեք նաև
«Իսկ հիմա օրվա լավագույն լուրը։ Երբ Երեւանում, հունվարին մենք մեկնարկում էինք այս ծրագիրը, խոսքը գնում էր 51 մլն եվրոյի մասին։ Քանի որ այս ամիսներին ընթացքում Եվրամիության անդամ պետություններ միացան այս նախաձեռնությանը, առաջիկա 5 տարվա համար նախատեսված բյուջեն մոտավոր կազմում է 116 միլիոն եվրո, որից 40 միլիոն եվրոն կլինի դրամաշնորհների տեսքով, իսկ 76 մլն-ը վարկային միջոցների»,-հայտարարեց Անդրեա Վիկտորինը։
Սյունիքի մարզպետ Ռոբերտ Ղուկասյանի խոսքով՝ վերջին մեկ տարում շատ ինտեսիվ աշխատանքներ ու գործընթացներ են տեղի ունեցել։ «Հարյուրավոր հանդիպումներ ենք ունեցել «Դիմակայուն Սյունիք Թիմ Եվրոպա» նախաձեռնության անդամների հետ։ Եվ այսօր տիկին դեսպանը հայտարարելով, որ գումարը կրկնապատկում է, հասկացա՝ որ մեզ ավելի ծանր աշխատանք է սպասվում»,-հայտարարեց Ռոբերտ Ղուկասյանը։ Նա հավաստիացրեց, իրականացվող ծրագրերը նպաստելու են Սյունիքի մարզի դիմադրողականության բարձրացմանը։
Եվրոպայի օրվան նվիրված միջոցառումները Սյունիքում կտեւեն երկու օր։
Արմեն ԴԱՎԹՅԱՆ
