Որպես գործարար այսօր Արցախին ավելի շատ կօգնեիք, եթե դրսում լինեիք։ Այսօր այսպիսի հարց ուղղվեց Արցախի նախկին պետնախարար Ռուբեն Վարդանյանին՝ «Արցախի անվտանգության եւ զարգացման ճակատ» հանրային շարժման անդամների ասուլիսի ժամանակ։
Ի պատասխան հարցի՝ Վարդանյանն ասաց․ «Նայած՝ ինչ դերում, նայած՝ ոնց․ եթե հնարավորություն լիներ գնալ-գալ․․․ ես վստահ եմ, եթե հնարավորություն ունենայի, եւ ոչ միայն ես, կարողանայինք Արցախը ներկայացնել աշխարհին, բայց դե հիմա․․․լինելով դրսում ու չկարողանալով գալ Արցախ, դա խնդիր է։ Շատ մարդիկ ինձ ասում են, որ այստեղ իմ ներկայությունն իրենց հույս է տալիս, որ ամեն ինչ չէ կորած։ Դրա համար իմ գնալը այստեղից մեծ հուսահատություն կբերի»։
Մեկ այլ հարցի էլ՝ ի՞նչ կարծիք ունի Հայաստանի եւ Արցախի մի շարք քաղաքական ուժերի հայտարարության մասին, ըստ որի՝ Հայաստանի իշխանություններն իրավասու չեն այնպիսի բանակցություններ վարել, որոնք կարող են Արցախը դիտարկել Ադրբեջանի կազմում, Վարդանյանը պատասխանեց․ «Ողջունում եմ այդ դիրքորոշումը։ Շատ կարեւոր է, որ մենք բոլորս պիտի ասենք մի բան, որը պետք է հասկանա նաեւ Հայաստանի կառավարությունը՝ ժողովուրդն իր կարծիքը հայտնելու է ոչ միայն նրանով, որ ձայն է տալիս ընտրությունների ժամանակ։ Հայկական աշխարհի շատ կարեւոր հարցերից մեկն է սա, որը չի կարող որոշվել մի խմբով, որը ղեկավարում է երկիրը, որովհետեւ սա ոչ թե կուսակցական կամ կառավարման խնդիր է, այլ սկզբունքային խնդիրներից մեկն է, որը մեր ազգի առաջ կանգնած է։ Հայտարարությունները լավ են, բայց ավելի լավ կլիներ հետո քայլեր լինեին ՝ պարզ ու հասկանալի»։
Վարդանյանի ներկայացմամբ՝ ամենակարեւոր հարցն այն է, թե ինչ է նշանակում պայքարել, ինչ է նշանակում չընդունել, ինչ է նշանակում չհամաձայնել ՀՀ կառավարության ներկայացրած դիրքորոշմանը․ «Դա պետք է ավելի հստակ լինի։ Այն անտարբերությունը, որը փորձում են ստեղծել Հայաստանում, թե Արցախի հարցը փակված է, ու ոչ մեկին չի հետաքրքրում, շատ կարեւոր է, որ մարդիկ զգան՝ դա այդպես չէ, որ մենք չենք ենթարկվելու Ադրբեջանի քայլերին, չենք համաձայնվելու Հայաստանի առաջարկին, որ հայկական աշխարհը զգա՝ դա անընդունելի Արցախի ու Հայաստանի հայերի համար»։
Կարդացեք նաև
Մանրամասները՝ տեսանյութում
Նելլի ԲԱԲԱՅԱՆ
