Արցախի հանրապետության խորհրդարանն այսօր առաջին ընթերցմամբ ընդունեց «Համաներման մասին» օրենքի նախագիծը: Երկրորդ ընթերցումը կկազմակերպվի այսօր 17.00-ին:
Նախագծով առաջարկվում է մինչև 2023 թվականի ապրիլի 1-ը ներառյալ` հանցագործություն կատարելու մեջ կասկածվող կամ հանցագործություն կատարած որոշ անձանց նկատմամբ հայտարարել համաներում: Նախագծի ընդունման անհրաժեշտությունը պայմանավորված է որոշ չափով մեղմացնելու հետպատերազմյան ժամանակաշրջանում Ադրբեջանի կողմից Արցախի Հանրապետության դեմ իրականացվող շարունակական ոտնձգությունների արդյունքում ստեղծված իրավիճակը, այդ թվում` Արցախի հանրապետությունը Հայաստանի հանրապետությանը կապող միակ ճանապարհի արգելափակման հետևանքով առաջացած հումանիտար ճգնաժամի հետևանքները:
Համաներումը չի տարածվելու պետական դավաճանության դեպքերի վրա:
Այսպիսով, նախագծի ընդունման արդյունքում, 20 դատապարտված անձանցից ազատ կարձակվեն 5-ը, 18 կալանավորված անձանցից՝ 2-ը, հաշվառման մեջ գտնվող 277 անձանցից 126-ը: Ընթացիկ քրեական գործերով հնարավոր չի եղել հաշվարկներ կատարել:
Կարդացեք նաև
ԱՀ խորհրդարանն ընդունեց նաեւ Արցախի Հանրապետության նախագահի կողմից օրենսդրական նախաձեռնության կարգով ներկայացված «Դատական օրենսգրքում լրացումներ և փոփոխություններ կատարելու մասին» օրենքի նախագիծը: Նախագծով առաջարկվում է` առանց համապատասխան կազմակերպությունում ուսուցում անցնելու իմպերատիվ պահանջն ապահովելու առաջին ատյանի դատարանի դատավորների թեկնածուների ցուցակում ընդգրկվելու հնարավորություն նախատեսել նաև վերջին տասը տարվա ընթացքում դատախազի, քննիչի, փաստաբանի գործունեությամբ աշխատանքի առնվազն 5 տարվա կամ պետական կամ տեղական ինքնակառավարման մարմնում որպես իրավաբան աշխատանքի առնվազն 7 տարվա ստաժ ունեցող անձանց:
Ընդդիմադիր խմբակցությունները չմասնակցեցին խորհրդարանի մշտական հանձնաժողովների թվակազմերի փոփոխության հարցի քվեարկությանը: ԱՀ խորհրդարանի ընդդիմադիր խմբակցությունների որոշումը բարձրաձայնեց «Արդարություն» խմբակցության պատգամավոր Դավիթ Գալստյանը՝ հայտարարելով, որ երեք տարի աշխատելուց հետո՝ հիմա խմբակցությունների թվակազմերի փոփոխությունն իրենց համար հասկանալի չէ:
Նելլի ԳՐԻԳՈՐՅԱՆ
