Արցախի խորհրդարանի նիստում այսօր Պաշտպանության, անվտանգության և օրինապահպանության հարցերի մշտական հանձնաժողովի նախագահ ընտրվեց Մարսել Պետրոսյանը՝ 20 «կողմ» ձայներով: Պաշտոնը թափուր էր մնացել Սեյրան Հայրապետյանի հրաժարականից հետո:
Սեյրան Հայրապետյանի հրաժարականի մասին, հիշեցնենք, մամուլում տեղեկություններ եղան, որ ՊԲ նախկին հրամանատար Սամվել Բաբայանի կազմակերպած հավաքներից մեկի ժամանակ ծեծկռտուք է եղել, որի ընթացքում դանակահարվել է Սեյրան Հայրապետյանը:
«Միասնական հայրենիք» խմբակցությունն առաջադրել էր Մարսել Պետրոսյանի թեկնածությունը: Մյուս խմբակցությունները թեկնածուներ չէին առաջադրել:
Հարցի զեկուցող, խմբակցության քարտուղար Դավիթ Բաղդասարյանից ընդդիմադիր պատգամավոր Մետաքսե Հակոբյանը հետաքրքրվեց՝ ինչո՞վ է պայմանավորված հանձնաժողովի նախագահի հրաժարականը: Դավիթ Բաղդասարյանը պատասխանեց՝ դա «Միասնական հայրենիք» խմբակցության ներքին խնդիրն է, ռոտացիա է տեղի ունեցել, առաջիկայում էլի ռոտացիաներ կլինեն:
Կարդացեք նաև
Տեղից ռեպլիկ նետեց ԱԺ նախագահ Արթուր Թովմասյանը. «Տիկին Հակոբյան, սաղ Արցախը գիտի պատճառը, դուք չգիտե՞ք»:
«Եթե հիմնավորում պետք է ընդունենք ասեկոսեները, ապա ընդունեք, որ Արցախը գիտի, պարոն Թովմասյան»,- արձագանքեց Մետաքսե Հակոբյանը:
Նելլի ԳՐԻԳՈՐՅԱՆ
