Ռուսաստանի արտգործնախարարության խոսնակ Մարիա Զախարովան Հայաստանին և Ադրբեջանին կոչ է արել զերծ մնալ սադրիչ բնույթի հայտարարություններից:
Նրա խոսքով՝ վերջին շրջանում իրավիճակը հայ-ադրբեջանական սահմանին լարված է եղել, Հայաստանի Գեղարքունիքի մարզի Սոթք բնակավայրի մոտակայքում տեղի են ունեցել հրադադարի ռեժիմի խախտումներ երկու կողմերից էլ:
«Իրավիճակն այժմ կայունացել է: Մենք կոչ ենք անում հայ և ադրբեջանական կողմերին զերծ մնալ սադրիչ հայտարարություններից և իրավիճակը սրելուց»,- ասել է Զախարովան:
Ըստ նրա՝ Ռուսաստանը կարծում է, որ բոլոր վիճելի հարցերը պետք է կարգավորվեն քաղաքական դիվանագիտական ճանապարհով: «Մոսկվան մտադիր է մշտապես նպաստել դրան, այդ թվում մայիսի 19-ին ծրագրված Հայաստանի, Ադրբեջանի և Ռուսաստանի արտգործնախարարների եռակողմ հանդիպման ընթացքում»,- ասել է Զախարովան:
Կարդացեք նաև
Նա նաև ասել է, որ նախատեսված են երկկողմ բանակցություններ Հայաստանի արտգործնախարար Արարատ Միրզոյանի և Ադրբեջանի արտգործնախարար Ջեյհուն Բայրամովի միջև:
«Մոսկվան ակնկալում է, որ քննարկումները կնպաստեն հայ-ադրբեջանական գործընթացի առաջմղմանը, վիճելի հարցերի լուծմանը»,- ասել է Զախարովան:
Պատրաստեց Վիկտորյա ԱՆԴՐԵԱՍՅԱՆԸ
