«Տեղական ինքնակառավարման մասին» օրենքի 102-րդ հոդվածի համաձայն՝ եթե օրենքով միավորված համայնքի ավագանու առաջին նիստն ավագանու լիազորությունները ստանձնելու պահից քսան օրվա ընթացքում չի գումարվում կամ սահմանված կարգով այդ ավագանու լիազորությունները վաղաժամկետ դադարեցվում են, ապա վարչապետին տրվում է համայնքի ղեկավարի պաշտոնակատար նշանակելու լիազորություն:
«Տեղական ինքնակառավարման մասին» օրենքում փոփոխությամբ «Հայաստան» խմբակցության պատգամավորներն առաջարկում են, որ համամասնական ընտրակարգով ձեւավորված համայնքի ավագանու առաջին նիստն ավագանու լիազորությունները ստանձնելու պահից քսան օրվա ընթացքում չգումարվելու դեպքում, տվյալ համայնքի ավագանու առավել մեծ թվով մանդատներ ունեցող խմբակցության գրավոր առաջարկով ՀՀ վարչապետը համայնքի ղեկավարի պաշտոնակատար նշանակի այդ խմբակցության կողմից առաջարկված խմբակցության անդամին:
«Մեր նպատակն է արձանագրել այն փաստը, որ պետությունը, Կառավարությունը, Ազգային ժողովը պարտավոր են հարգել կայացած ընտրությունների արդյունքում համայնքի բնակչության դիրքորոշումը»,- ընդգծել է նախաձեռնության համահեղինակ Արմենուհի Կյուրեղյանը եւ հավելել, որ քաղաքական պատասխանատվություն կրողը պետք է լինի այն քաղաքական ուժը, որին ամենաշատը վստահել է համայնքը:
Կառավարությունն առաջարկում է ձեռնպահ մնալ առաջարկվող կարգավորումից, գործող օրենքի հոդվածները թողնել անփոփոխ: Նախաձեռնության վերաբերյալ գործադիրի դիրքորոշումը ներկայացրել է ՀՀ տարածքային կառավարման եւ ենթակառուցվածքների նախարարի տեղակալ Վաչե Տերտերյանը: Չնվազեցնելով համայնքի բնակչության ընտրության արդյունքների կարեւորությունը՝ Կառավարության գնահատմամբ համայնքի ղեկավարի պաշտոնակատար նշանակելիս առավել կարեւոր է նշանակման հարցում քաղաքական պատասխանատվություն ստանձնելը: Առաջարկվող տարբերակում այդ պատասխանատվությունը ստանձնելու է վարչապետը, սակայն պաշտոնակատարի նշանակումը կատարելու է խմբակցության առաջարկի հիման վրա: Այդ պարագայում քաղաքական պատասխանատվություն վերցնելը կկրի ձեւական բնույթ, քանի որ այն առաջացել է ոչ թե նշանակողի նախաձեռնությամբ, այլ համայնքի ավագանու առավել մեծ թվով մանդատներ ունեցող խմբակցության գրավոր առաջարկով:
ԱԺ «Հայաստան» խմբակցության պատգամավորներ Արմենուհի Կյուրեղյանի, Գառնիկ Դանիելյանի, Արման Ղազարյանի եւ Արթուր Սարգսյանի հեղինակած ««Տեղական ինքնակառավարման մասին» օրենքում փոփոխություն եւ լրացում կատարելու մասին» օրինագիծն առաջին ընթերցմամբ քննարկվել է Տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովի՝ մայիսի 17-ի նիստում:
Կարդացեք նաև
Այն չի ստացել դրական եզրակացություն:
ՀՀ ԱԺ
