Ամփոփելով իր պաշտոնավարման 100 օրը՝ Կրթության տեսչական մարմնի ղեկավար Վաղարշակ Մատիկյանը «Արմենպրես» լրատվական գործակալությունում նշեց, որ իրենք իրենց առջեւ դրել են երեք հիմնական աշխատանքների կատարում, միաժամանակ իրականացնում են օրենսդրությամբ իրենց վերապահված լիազորությունները եւ գործառույթները:
Երեք հիմնական աշխատանքներն են. ստուգաթերթերի վերանայում-լավարկումը, որոնց հիման վրա իրականացվում են ուսումնական հաստատություններում ստուգումները, ռիսկերի մեթոդաբանության վերանայում-լավարկումը եւ երրորդ, որ մեկնարկել են թվայնացման աշխատանքների շուրջ քննարկումները:
«Այս երեք խնդիրների լուծումը մեզ համար ռազմավարական նշանակություն ունի: Սրանց արդյունքում ԿՏՄ-ն ակնկալում է սեփական գործառույթների իրականացման առավել բովանդակայնացում, ինչպես նաեւ մարդկային եւ նյութական ռեսուրսների խնայում, իսկ ռիսկերի մեթոդաբանության վերանայման շնորհիվ ոլորտի խոցելի կողմերի վերաբերյալ առավել հավաստի եւ ամբողջական տվյալների տիրապետում»,-ասաց Վաղարշակ Մատիկյանը:
Նա տեղեկացրեց, որ 2023 թվականի ստուգումների ծրագրով նախատեսված է ստուգումներ իրականացնել 140 ուսումնական հաստատություններում, որոնցից 120-ը դպրոցներ են, 9-ը՝ նախնական եւ միջին մասնագիտական ուսումնական հաստատություններ եւ 11-ը՝ նախադպրոցական ուսումնական հաստատություններ:
Կարդացեք նաև
«Բնականաբար, տարվա ընթացքում ստուգումներ իրականացվում են նաեւ օրենսդրությամբ սահմանված այլ դեպքերում, դիցուք, դիմում-բողոքների հիման, կամ պետական մարմիններից ստացված տեղեկատվության հիման վրա: 2023 թվականի առաջին եռամսյակի ընթացքում ստուգումներ են իրականացվել 37 ուսումնական հաստատություններում: Այս պահին արդեն մշակվել են դրանցից 30-ում իրականացված ստուգման արդյունքները: Յոթ ուսումնական հաստատությունների արդյունքներ մշակման փուլում են եւ կներկայացվեն երկրորդ եռամսյակի ընթացքում: Արձանագրվել են օրենսդրության շուրջ 502 խախտումներ 30 ուսհաստատություններում»,-ասաց ԿՏՄ ղեկավարը:
Նա տեղեկացրեց, որ իրականացվել են նաեւ գնահատման այլ գործողություններ, որոնց հիման վրա տրվել են ցուցումներ, արդյունքների մասին տեղյակ են պահվել ուսումնական հաստատությունների լիազոր մարմինները, ինչպես նաեւ ԿԳՄՍ-ն:
Աշոտ ՀԱԿՈԲՅԱՆ
