Առաջարկվում է, որ Երեւանի տեղական ինքնականառավարման մարմինների՝ Երեւանի քաղաքապետի եւ ավագանու ընդունած իրավական ակտերը հրապարակվեն ոչ միայն Երեւան քաղաքի պաշտոնական կայքում, այլեւ Հայաստանի Հանրապետությունում ստեղծված եւ գործող նորմատիվ իրավական ակտերի հրապարակման միասնական www.arlis.am կայքում:
«Սա բնակիչներին, կազմակերպություններին ավելի հասանելի կդարձնի Երեւանի քաղաքապետի եւ ավագանու ընդունած իրավական ակտերը: Այս պրակտիկան փորձարկելուց հետո, եթե ամեն ինչ նորմալ ընթանա, այսինքն՝ համակարգը չծանրաբեռնվի եւ արդյունավետությունը չնվազի, մենք կքննարկենք եւ նույն առաջարկով հանդես կգանք տեղական ինքնակառավարման մյուս մարմինների համար»,- ասել է ՀՀ տարածքային կառավարման եւ ենթակառուցվածքների նախարարի տեղակալ Վաչե Տերտերյանը՝ ԱԺ տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովի՝ մայիսի 17-ի նիստում առաջին ընթերցմամբ քննարկման ներկայացնելով ««Երեւան քաղաքում տեղական ինքնակառավարման մասին» օրենքում փոփոխություններ եւ լրացում կատարելու մասին» օրենքի նախագիծը:
Նշվել է, որ Երեւան քաղաքի տեղական ինքնակառավարման մարմինների կողմից յուրաքանչյուր տարի ընդունվում է ավելի քան 6000 ակտ: Երեւանում բնակվող անձանց եւ մայրաքաղաքում գործունեություն իրականացնող բազմաթիվ իրավաբանական անձանց իրենց գործունեության իրականացման ընթացքում հաճախ անհրաժեշտ է լինում ծանոթանալ վերոնշյալ ակտերին:
Հանձնաժողովը նախագծին դրական եզրակացություն է տվել:
Կարդացեք նաև
ՀՀ ԱԺ
