Երեւանի փոխքաղաքապետ Տիգրան Ավինյանը շատ քննադատվեց, որ առանց նախապես հերքում պահանջելու լրագրող Դավիթ Սարգսյանի դեմ հայց ներկայացրեց՝ դատարանից հայցի ապահովման միջոց կիրառելու պահանջ ներկայացնելով, ինչի արդյունքում արգելանքի տակ առնվեցին լրագրողի գույքն ու դրամական միջոցները:
Լրագրողի ներկայացուցիչ Արամ Օրբելյանը նկատում է, որ Քաղաքացիական դատավարության օրենսգրքով՝ զրպարտության կամ վիրավորանքի հայց ներկայացնելու որպես նախապայման չի նախատեսում, հիմնական դեպքերում, նման պահանջ ներկայացնելը. «Բայց դա չի նշանակում, որ նման փաստը չունի իրավական որեւէ արժեք, այլ գործընթացների տեսակետից: Քանի դեռ չենք տեսել հայցադիմումը, չենք ստացել հայցադիմումի տեքստը, չեմ գնահատում՝ ինչն են վիրավորական համարել, ինչն են զրպարտչական համարել: Ունենք ինչ-որ ընկալում, որ դա այդ տեսագրության հետ (խմբ. «Երկու երես» հաղորդաշարի հերթական թողարկման )կապված է, բայց կարող է պարզվել, որ այլ նյութերի հետ է կապված, երբ ստանանք, հասկանանք՝ ինչի մասին է խոսքը, հնարավոր կլինի գնահատել»:
Հիշեցնենք, որ լրագրող Դավիթ Սարգսյանի դեմ կիրառված հայցի ապահովման միջոցի մասով Տիգրան Ավինյանի ներկայացուցիչ փաստաբան Հարություն Հարությունյանը միջնորդություն է ներկայացրել դատարանին՝ Դավիթ Սարգսյանի գույքի և դրամական միջոցների նկատմամբ կիրառված արգելանքը վերացնելու վերաբերյալ։
Փաստաբան Օրբելյանը այս փուլում չցանկացավ գնահատել Ավինյանի պաշտպանական կողմի գործիքակազմը, չմեկնաբանեց, թե ինչ է փոխվել, որ Ավինյանի ներկայացուցիչը միջնորդություն է ներկայացրել դատարանին՝ Դավիթ Սարգսյանի գույքի և դրամական միջոցների նկատմամբ կիրառված արգելանքը վերացնելու վերաբերյալ:
Կարդացեք նաև
«Քանի դեռ չունենք՝ ինչ հայց է ներկայացված, ինչ էլ մեկնաբանեմ, կստացվի մեկնաբանում եմ ինչ-որ մեկնաբանություն: Որը, առնվազն փաստաբանի գործառույթ չէ»,- հավելեց Օրբելյանը:
Արփինե ՍԻՄՈՆՅԱՆ
