Հարկադիր կատարումն ապահովող ծառայության պաշտոնական կայքէջում արդեն ներդրվել է անձնական գրասենյակ՝ էլեկտրոնային հարթակ, որի միջոցով քաղաքացիները գրանցվելով, նույնականացվելով, համաձայնություն տալով կայքի օգտագործման պայմաններին՝ հնարավորություն են ստանալու անմիջապես՝ ինքնաշխատ եղանակով ծանոթանալ իրենց նկատմամբ առկա կատարողական վարույթներին:
Նախկինում քաղաքացին, ենթադրենք, պետք է 10 վարույթով կատարեր վճարումներ, որոնցից յուրաքանչյուրի համար աշխատակիցը գործողություններ էր կատարում, այս նոր փոփոխությամբ՝ աշխատակիցը մեկ գործողությամբ ընդհանուր գումարը գանձում է, որը խնայում է, և՛ աշխատակցի, և՛ քաղաքացու ժամանակը: Այս մասին այսօր «Արմենպրեսի» մամուլի սրահում ասաց Հարկադիր կատարումն ապահովող ծառայության քաղաքացիների սպասարկման բաժնի պետ Խաչատուր Իգիթյանը՝ անդրադառնալով Հարկադիր կատարումն ապահովող ծառայությունը բարելավմանն ուղղված փոփոխություններին:
Խաչատուր Իգիթյան
Նրա հավաստիացումներով, համակարգն արդեն մեկ շաբաթ է՝ այս ծրագրով է աշխատում և արդյունքները տեսանելի են, նվազել են քաղաքացիների դժգոհությունները, բարձրացել աշխատակիցների աշխատանքի արդյունավետությունը: Արդյունքում ակնկալում են բարելավել քաղաքացիներին մատուցող սպասարկումների որակը և «մոռացնել տալ գոյություն ունեցող հերթերը»: Գրասենյակում օրական սպասարկվում է 600 քաղաքացի:
«Հարկադիր կատարումն ապահովող ծառայության պաշտոնական կայքէջում արդեն ներդրվել է անձնական գրասենյակ՝ էլեկտրոնային հարթակը, որի միջոցով քաղաքացիները գրանցվելով, նույնականացվելով, համաձայնություն տալով կայքի օգտագործման պայմաններին՝ հնարավորություն են ստանալու անմիջապես՝ ինքնաշխատ եղանակով ծանոթանալ իրենց նկատմամբ առկա կատարողական վարույթներին, հետևել կատարողական գործողությունների ընթացքին, ներբեռնել, ծանոթանալ որոշումներին: Ասեմ ավելին՝ ամբողջական կամ մաս-մաս վճարումներ կատարելու դեպքում հետևել վճարումների շարժընթացին, անգամ ամբողջությամբ պարտավորությունը կատարելու դեպքում հետևել ապաարգելադրման գործընթացին: Այս գործիքի նպատակն է քաղաքացուն դարձնել իր կատարողական վարույթների մասնակից՝ հսկելիության տեսանկյունից և ապահովել մատչելիությունը ցանկացած տեղեկատվություն ստանալու համար»,-նշեց գլխավոր հարկադիր կատարողի օգնական, մամուլի քարտուղար Վարդուհի Պետրոսյանը:
Կարդացեք նաև
Վարդուհի Պետրոսյան
Նա տեղեկացրեց, որ համակարգի գործունեության մեկ տարվա ընթացքում՝ գործարկման մեկնարկին, օգտվողները 2000 հոգի էին, այսօր այն հատել է 7000-ի սահմանը: Պետրոսյանի խոսքով, այս դինամիկան խոսում է այն մասին, որ քաղաքացիների շրջանում մեծացել է էլեկտրոնային գործիքների կիրառելիության նկատմամբ հետաքրքրությունը, թեպետ դեռևս քաղաքացիների մի հատված էլ նախընտրում է ֆիզիկապես ծառայություն ստանալ հենց գրասենյակում:
Լուսինե ՄԱՐԳԱՐՅԱՆ
