Գյումրիում զբոսաշրջության մեկնարկն արդեն տրված է․ հատկապես շաբաթ-կիրակի օրերին պատմական հատվածը մարդաշատ է․ այս քաղաք են շտապում ինչպես տարբեր մարզերից (հատկապես դպրոցահասակներ), այնպես էլ մեծ թվով օտարերկրյա զբոսաշրջիկներ։ Նկատելի է, որ նրանց մեջ գերակշռում են ռուսները։
Ամեն զբոսաշրջային սեզոնի հրատապ է դառնում հասարակական զուգարանների հարցը։ Այն անհապաղ լուծման կարիք ունի։
Զբոսաշրջային ընկերությունների ղեկավարները բազմիցս են մեր զրույցներում բարձրաձայնել, որ խայտառակվում են զբոսաշրջիկների առաջ, ստիպված թակում են թանգարանների, ռեստորանների, սրճարանների, վարսավիրանոցների դռները, որպեսզի թույլատրեն օգտվել իրենց զուգարաններից։ Ըստ զբոսավարների, մարդ կա՝ թույլատրում է, մարդ կա՝ կտրականապես մերժում, քանի որ խմբերը մեծ են լինում․ այսպիսով ընկնում է քաղաքի վարկանիշը։
Գյումրիում սկսվում է զբոսաշրջային պիկը, մինչդեռ այս քաղաքը պատրաստ չէ դրան։
Կարդացեք նաև
Զբոսաշրջային ընկերության ղեկավարներից ոմանք նաև նշում են, որ Գյումրիում հասարակական զուգարաններ կառուցելը շահութաբեր չէ, քանի որ քաղաքը ողջ տարին զբոսաշրջային չէ, օրինակ՝ ձմռանն անհնար է դրանք շահագործել, հետևաբար և այս հարցում պիտի օգնի պետությունը կամ ՏԻՄ-ը։
Գյումրու ավագանու վերջին նիստից հայտնի դարձավ, որ Գյումրու քաղաքապետարանն ունի նման մտադրություն։
Զեկուցվող հարցերի մեջ էր Գերմանիայի միջազգային համագործակցության կողմից իրականացվող «Լավ կառավարում հանուն տեղական զարգացման Հարավային Կովկասում» ծրագրի շրջանակներում հայտարարած դրամաշնորհային մրցույթին մասնակցելու ու համաֆինանասնավորում ապահովելու համար ավագանու համաձայնությունը ստանալու հարցը։
Այդ ծրագիրը իրականացվում է ՀՀ տարածքային կառավարման և ենթակառուցվածքների նախարարության հետ։ Նախատեսվում է հատկացնել 16 միլիոն դրամի դրամաշնորհ՝ իհարկե, համայնքների հետ համաֆինանսավորմամբ։
Համայնքների մասնակցությունը պետք է լինի 10 տոկոս։ Ավագանու նիստի ժամանակ պարզաբանվեց՝ դրամաշնորհը ստանալու դեպքում Գյումրիում կամ ինֆորմացիոն կետեր կստեղծվեն կամ հասարակական զուգարաններ կկկառուցվեն, որպեսզի Գյումրի, ըստ քաղաքային իշխանության, հարմարավետ դառնա զբոսաշրջիկների համար։
Նունե ԱՐԵՎՇԱՏՅԱՆ
