«Նովայա գազետա Եվրոպա» պարբերականին տված հարցազրույցում ՀՀ ԱԽ քարտուղար Արմեն Գրիգորյանը հայտարարել էր, որ նոր մեխանիզմներ և սպառազինության մատակարարումներ են անհրաժեշտ, քանի որ Հայաստանը չի ստանում այն, ինչ պատվիրել ու վճարել է Ռուսաստանին։
Այսօր խորհրդարանում լրագրողների հետ զրույցում, անդրադառնալով ԱԽ քարտուղարի այդ հայտարարությանը, «Հայաստան» խմբակցության պատգամավոր Արթուր Խաչատրյանն ասաց. «Եթե Ռուսաստանը տասնյակ տարիներ սպառազինության հետ կապված իր ստանձնած պարտավորությունները պատշաճ կատարում էր, հիմա չի կատարում, դա ցույց է տալիս այս իշխանությունների անբաշարությունն ու անընդունակությունը։ Եթե ես գնամ տուն՝ լացեմ ու ասեմ, որ հաց վաճառողը ինձ հաց չի վաճառում, երեխեքը սոված են, ես իրավունք ունե՞մ հայր կամ ամուսին կոչվելու։ Ի՞նչ է նշանակում… Թող իրենք իրենց պարտականությունների մասին մտածեն, ոչ թե իրենց անբաշարության մասին ողբան և ուրիշներին մեղադրեն»:
Հիշեցնենք, ավելի վաղ Նիկոլ Փաշինյանն էր հայտարարել, որ հարյուր միլիոնավոր դոլարներ վճարված են, բայց Հայաստանի նկատմամբ մատակարարումների պարտավորությունները չեն կատարվում դաշնակից երկրների կողմից։
Ընդդիմադիր գործիչը նկատում է՝ ռուսական կողմի քաղաքականության վերաբերյալ շատ վերապահումներ ունեն, բայց ավելի շատ վերապահումներ ունեն հայկական իշխանությունների վարած քաղաքականության նկատմամբ:
Կարդացեք նաև
Հայաստանում ԵՄ պատվիրակության ղեկավար, դեսպան Անդրեա Վիկտորինն այսօր հայտարարել է, որ հայկական զորքերը գտնվում են ադրբեջանական սահմանին՝ 1-2 կետով: Թե ինչի՞ մասին է խոսել ՀՀ-ում ԵՄ պատվիրակության ղեկավարը՝ Արթուր Խաչատրյանը լիազորված չէ մեկնաբանել, բայց նա գտնում է, որ տիկին Վիկտորինը ամենաշատն է նպաստում՝ Հայաստանում հակաեվրոպական տրամադրությունների առաջացմանը:
Նելլի ԳՐԻԳՈՐՅԱՆ
