Թուրքիայում տեղի կունենա նախագահական ընտրությունների երկրորդ փուլ, գրում է Reuters-ը: Քվեաթերթիկների 99%-ի հաշվարկից հետո գործող նախագահ Ռեջեփ Թայիփ Էրդողանը հավաքել է ընտրողների ձայների 49%-ը, իսկ նրա մրցակից Քեմալ Քըլըչարօղլուն մոտ 45%: Փաստացի թեկնածուներից ոչ մեկին ընտրությունների առաջին փուլում չի հաջողվել հաղթահարել ձայների 50%-ի շեմը, ուստի նախագահը կորոշվի երկու շաբաթ անց՝ մայիսի 28-ին՝ ընտրությունների երկրորդ փուլի արդյունքում:
Քըլըչդարօղլուն ասել է, որ երկրորդ փուլում ինքն է հաղթելու: Նա կոչ է արել իր կողմնակիցներին լինել համբերատար և մեղադրել Էրդողանի կուսակցությանը արդյունքների հաշվարկին միջամտելու մեջ:
Էրդողանի արդյունքները նախընտրական հարցումների արդյունքում ունեցած կանխատեսումներից ավելի բարձր են:
«Մենք արդեն 2,6 միլիոն ձայնով առաջ ենք մեր ամենամոտ մրցակցից, մենք ակնկալում ենք, որ պաշտոնական արդյունքներով այս ցուցանիշը կավելանա»,- ասել է Էրդողանը՝ դիմելով իր համակիրներին։
Կարդացեք նաև
Էրդողանի հազարավոր համախոհներ հավաքվել են Անկարայում կուսակցության կենտրոնակայանի մոտ՝ բարձրախոսներից հնչեցնելով կուսակցության երգերը և ծածանելով դրոշները:
«Մենք գիտենք, որ սա դեռ իրական տոն չէ, բայց հուսով ենք, որ շուտով կնշենք նրա հաղթանակը: Էրդողանը լավագույն ղեկավարն է, որ մենք ունեցել ենք այս երկրի համար, և մենք սիրում ենք նրան», – ասել է 39-ամյա Յալչին Յըլդրիմը:
Նախագահի երրորդ թեկնածուն՝ ազգայնական Սինան Օգանը հավաքել է ձայների 5,3%: Ըստ վերլուծաբանների՝ հենց նրա ձայնը կարող է որոշիչ լինել երկրորդ փուլում՝ կախված նրանից, թե որ թեկնածուին կպաշտպանի:
Պատրաստեց Վիկտորյա ԱՆԴՐԵԱՍՅԱՆԸ
