«Արդար Հայաստան» կուսակցության կառավարման խորհրդի ընդլայնված համաժողովի օրակարգում հետեւյալ հարցերն էին՝ Նիկոլ Փաշինյանի հնգամյա գործունեությանը քաղաքական գնահատական տալը, «Արդար Հայաստան» կուսակցության համագումար հրավիրելը եւ «Արդար Հայաստանի»՝ Երևանի ավագանու ընտրություններին մասնակցելը։
«Քանի որ լրանում է գործող իշխանության կառավարման 5 տարին, պատեհ առիթ է յուրօրինակ գնահատական տալ նրանց գործունեությանը, այնպես էլ հանրությանը հաշվետվություն ներկայացնել մեր գործունեության մասին»,-ասաց «Արդար Հայաստան» կուսակցության նախագահ Նորայր Նորիկյանը:
«Շատ լավ գիտակցում ենք, որ կանգնած ենք պետություն ունենալ-չունենալու խնդրի առաջ, վաղվա օրվա հանդեպ անորոշություն է: 2018թ այս օրերին բոլորովին այլ պատկեր էր Հայաստանի Հանրապետությունում, հայ ժողովուրդն իսկապես ապրում էր երջանիկ ակնթարթներ: Հեռացել էր նախորդ քաղաքական ռեժիմը եւ հույս էր արթնացել հասարակության մոտ: Այս հինգ տարիներն ապացուցեցին, որ 2018թ հերոսը միայն Նիկոլ Փաշինյանը չէր »,-ասաց Նորայր Նորիկյանը:
«Արդար Հայաստան» կուսակցության առաջնորդի խոսքով. «Անցած 5 տարիներն ապացուցեցին, որ պոպուլիզմն, այնուամենայնիվ, չարիք է, իսկ դրանով զբաղվողները՝ այդ չարիքից վարպետորեն օգտվող մոլորյալներ…Վերջին հինգ տարիներին մենք ականատես եղանք գործող իշխանության խոսքի ու գործի, սեփական խոստումները դրժելու բազմաթիվ տեսարաններին…Նիկոլ Փաշինյանը Հայաստանում իշխանությունը վերցրել է իր ձեռքը: Մեզ միշտ ուժեղ իշխանություն է պետք, սակայն ուժեղ իշխանության ընկալումն ու տրամաբանությունը մեր երկրում, ցավոք, խաթարված են: Ուժեղ իշխանությունը չի կարող արտահայտված լինել մեկ գլխով, մինչդեռ պետական իշխանության համակարգում այսօր իրացվում է բացառապես Նիկոլ Փաշինյանի կամքը»:
Կարդացեք նաև
Ի թիվս այլնի, նա Ռուսաստանին էլ անդրադարձավ. «Եթե Կրեմլի համար ազգերի ինքնորոշման իրավունքը կիրառելի է Աբխազիայի, Օսիայի, Դոնբասի համար, ապա Արցախի համար կիրառելի չէ, քանի որ չի բխում Ռուսաստանի աշխարհաքաղաքական շահերից»:
Գոհար ՀԱԿՈԲՅԱՆ
Լուսանկարը՝ Նորայր Նորիկյանի ֆեյսբուքի էջից
