«Ադրբեջանի ռազմական ոստիկանությունում հայ գերիներին դաժան ծեծի են ենթարկել: Դրանք զուգակցվել են սննդից, քնից զրկելու միջոցով, նաեւ ենթարկել են եղանակային պայմանների ազդեցությանը՝ պատճառելով հավելյալ տառապանք: Օրինակ, հատկապես ցուրտ եղանակին եւ արհեստականորեն այնպիսի պայմանների մեջ են դրել, որ սառելու հետևանքով հավելյալ տառապանք պատճառեն»,- այսօր կայացած մամուլի ասուլիսում այս մասին ասաց ՄԻԵԴ-ում հայ գերիների շահերի ներկայացուցիչ, փաստաբան Սիրանուշ Սահակյանը:
«Թաթոյան» հիմնադրամը նոր զեկույց է հրապարակել, որը վերաբերվում է 2022-ի սեպտեմբերի 13-14-ին Ջերմուկի վրա ադրբեջանական հարձակմանը: Զեկույցը պատրաստվել է Սիրանուշ Սահակյանի հետ համատեղ:
Սիրանուշ Սահակյանի փոխանցմամբ, հայ գերիների նկատմամբ այս գործելաոճն իրականացվել է ադրբեջանական հատուկ ծառայությունների հսկողության ներքո, նաեւ գերեվարված հայերի նկատմամբ ավելի ինտենսիվ ու անմարդկային վերաբերմունք է ցուցաբերվել պահման վայրերում, որտեղ հենց ազգային ինքնասիրությունը վիրավորելու ճանապարհով ընդգծել են ադրբեջանցիների գերակայությունը հայկական էթնիկ խմբի նկատմամբ։
2020 թվականի պատերազմից հետո իրենց հսկողության ներքո գտնվող անձանց ընտանիքների հանդեպ ադրբեջանական կողմը շարունակում է հավելյալ տառապանք պատճառող նպատակաուղղված գործողությունները՝ խոշտանգումների, նվաստացումների տարբեր տեսանկարահանումներ տարածելով: Հայ գերիների նկատմամբ վատ վերաբերմունքին ներգրավվում են նաեւ քաղաքացիական անձինք, բուժաշխատողներ. «Ռազմական կամ քաղաքացիական բժիշկները, որոնք առնչվում էին զինծառայողներին, բռնություն էին կիրառում։ Վերջին միջադեպերով ունեցել ենք բազմաթիվ վկայություններ, որ ռազմագերիներին հանձնել են քաղաքացիական անձանց։ Օրինակ՝ դեպի Բաքու տեղափոխվելիս կանգ են առել մի գյուղում, որտեղ արդեն հավաքված են եղել քաղաքացիական անձինք ու ռազմագերուն, մեքենայից գլորելով՝ ցած են նետել նրանց առջեւ, որոնք բռնություն են կիրառել»:
Կարդացեք նաև
Իսկ ադրբեջանցի բժիշկները ռազմագերիներին բուժօգնության տրամադրման կադրեր են բեմականացրել, որ ցույց տան միջազգային կառույցներին, թե մարդասիրական իրավունքը չի խախտվել։
Նելլի ԳՐԻԳՈՐՅԱՆ
