Այսօր Երեւան քաղաքի ընդհանուր իրավասության դատարանի Ավան եւ Նոր Նորք նստավայրում, Վահե Միսակյանի նախագահությամբ շարունակվեց «դիզվառելիքի գործով» դատական նիստը: Դատարանը հարցաքննում է ամբաստանյալներին: Նախորդ դատական նիստում, հիշեցնենք, դատարանը հրապարակեց գյուղատնտեսության նախկին նախարար, հանգուցյալ Սերգո Կարապետյանի նախաքննական ցուցմունքը: Այսօր հարցաքննվեց Գեւորգ Հարությունյանը: Նա խնդրո առարկա ժամանակաշրջանում գյուղնախարարությունում բուսաբուծության վարչության պետի պաշտոն է զբաղեցրել:
Նա դատարանում հայտարարեց, որ հանգուցյալ նախարար Սերգո Կարապետյանն իրեն ուղղորդել է նախաքննական ցուցմունք տալուց առաջ, իսկ հաջորդ հարցաքննության ժամանակ ինքը փոխել է իր ցուցմունքը ու հավելեց, որ փոխնախարար Սամվել Գալստյանն էլ է առաջին հարցաքննության ժամանակ մի ցուցմունք տվել, հետո՝ փոխել է այն ու դա ինքը պատահականություն կամ զուգադիպություն չի համարում: Իր ու փոխնախարարի առաջին ու երկրորդ ցուցմունքները, որոնք արմատապես տարբերվում են միմյանցից, եղել են 1-2 օր տարբերությամբ:
Ամբաստանյալը կարծում է, որ եթե Սերգո Կարապետյանն իրեն թույլ տվել էր դիմել՝ ցուցմունքում ինչ-որ բան ասելու խնդրանքով, փոխնախարար Սամվել Գալստյանին միանշանակ կարող էր դիմել, քանի որ նրանց փոխհարաբերությունները դա թույլ էին տալիս:
Գեւորգ Հարությունյանի պաշտպանն ընթերցեց Սերգո Կարապետյանի նախաքննական ցուցմունքից այն հատվածը, որը վերաբերվում էր «Ֆլեշ» ընկերության ընտրությանը ու հետաքրքրվեց, թե այդ ցուցմունքում ի՞նչը իրականությանը չէր համապատասխանում: Ամբաստանյալը պատասխանեց, որ ամբողջությամբ չի համապատասխանում իրականությանը:
Կարդացեք նաև
Մանրամասները՝ տեսանյութում
Դատախազն ամբաստանյալին հարցրեց՝ սուտ ցուցմո՞ւնք եք տվել: «Ես խաբվել եմ: Ես ցուցմունք եմ տվել, որն իրականությանը չէր համապատասխանում, ինչի համար ես զղջացել եմ, որից հետո գնացել եմ եւ ասել եմ, որ սխալ էր այդ տեղեկատվությունը եւ գնացել՝ հրաժարվել եմ»,-պատասխանեց ամբաստանյալը՝ հավելելով, որ Սերգո Կարապետյանին չհավատալու պատճառ չուներ ու հոգնել էր ամեն օր քննչական քաշքշուքներից՝ մտածել է՝ «հեսա՝ փողերը կտան, գործը կկարճվի, կպրծնենք»: Ամբաստանյալն ասաց, որ իր տված առաջին ցուցմունքը ինքը փորձել է տեղավորել այն տրամաբանության մեջ, որ «Սերգո Վաչագանիչը ասել է, որ ես իբր տեղյակ եմ դրանից»:
Մանրամասները՝ տեսանյութում
Հիշեցնենք, այս գործով ՀՀ երրորդ նախագահ Սերժ Սարգսյանին մեղադրանք է առաջադրված առանձնապես խոշոր չափերով յուրացման/վատնման համար․ ըստ մեղադրանքի, նրա կազմակերպմամբ եւ «Ֆլեշ» ընկերության սեփականատեր Բարսեղ Բեգլարյանի դրդմամբ՝ 2013թ․ հունվարից մինչեւ փետրվարը կառավարության պահուստային ֆոնդից վատնվել է պետական աջակցության ծրագրերի իրականացման ընթացքում 15 391 765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489 160 310 ՀՀ դրամ: Այս գործով մեղադրյալի կարգավիճակում էին նաեւ ՀՀ գյուղատնտեսության նախկին նախարար Սերգո Կարապետյանն ու նրա տեղակալ Սամվել Գալստյանը, որոնց նկատմամբ քրեական հետապնդումը դադարեցվել էր․ նախկին պաշտոնյաները մահացել էին կորոնավիրուսից։
Նելլի ԳՐԻԳՈՐՅԱՆ
