«Այլընտրանքային նախագծեր» խմբի հիմնադիր-անդամ Վահե Հովհաննիսյանի դիտարկմամբ՝ գեներալ Գրիգորի Խաչատուրովին առաջադրված մեղադրանքն անիմաստ ու վաղեմության ժամկետն անցած է:
«Մեղադրյալի աթոռին մարդ է, որը այս պահին արժանապատվության ու չզիջելու, չպարտվելու եզակի սիմվոլներից է»,- ասաց Հովհաննիսյանը:
Նրա խոսքով, այսօր այս գործի քննությունը պետք է դիտարկել ոչ թե այն ձեւաչափով, թե ով է գործը քննող դատավորը, ինչ առնչություն ունի իշխանական շրջանակների հետ, այլ, թե որտեղ է ընթանում. «Այս դատը գնում է այսօրվա Հայաստանում, որտեղ խաղի կանոնները շատ այլասերված են, որտեղ կա մեկ հոգու իշխանություն, պետական բոլոր ինստիտուտները ծառայում են մեկ հոգու»:
Հովհաննիսյանը կրկնեց իր ավելի վաղ հայտնած միտքը, որ այս դատավարությունը պետք է վերածվի քաղաքացիական նոր շարժման՝ ի պաշտպանություն ազգային արժանապատվության. «Որովհետեւ, եթե ամեն ինչի դեպքում լռում ենք, ավելի այլանդակ տեսարանի ենք հանդիպում…էս երկրում ծայրից ծայր քրեական գործեր են, ծայրից ծայր անօրինականություններ են: Գրիգորի Խաչատուրովն այն մարդն էր, որ 2020 թվականին տավուշյան դեպքերի ժամանակ ամբողջ ազգով նրանով հիանում էին, իր համար աղոթում էին՝ մեր հերոսը, գեներալը, հիմա գեներալին բերել են ինչ-որ չոլի, երկու մետրի համար անհասկանալի մեղադրանքով»:
Կարդացեք նաև
Վահե Հովհաննիսյանն այսօր նույնպես Հակակոռուպցիոն դատարանի շենքի դիմաց էր՝ ի աջակցություն գեներալ Գրիգորի Խաչատուրովի:
Հիշեցնենք, որ դատարանում դռնփակ նիստով ընթանում էր գեներալի գործով դատական նիստը:
Հիշեցնենք, որ ԱԺ 8-րդ գումարման 5-րդ նստաշրջանի փետրվարի 7 նիստում քննարկվում էր ԱԺ «Հայաստան» խմբակցության պատգամավոր, ՀՀ պաշտպանության նախկին նախարար Սեյրան Օհանյանի նկատմամբ հանրային քրեական հետապնդում հարուցելուն համաձայնություն տալու մասին ՀՀ գլխավոր դատախազի միջնորդագիրը։ Ըստ ԱԱԾ-ի ձեռքբերած տվյալների՝ պաշտպանության նախարար եղած ժամանակ Սեյրան Օհանյանը կատարել է առանձնապես խոշոր չափերով վատնում, ինչպես նաեւ անձնական այլ շահագրգռվածությունից եւ խմբային շահերից ելնելով՝ իր պաշտոնեական դիրքն օգտագործել է ծառայության շահերին հակառակ․ մասնավորապես, հողային օրենսգրքի խախտմամբ երկու զորամասերի՝ «Երասխ 1»-ի եւ «Երասխ 2»-ի տարածքները, որոնք ՊՆ-ի սեփականությունն են հանդիսացել, օտարվել են և անհամեմատ էժան գնով վաճառվել, իսկ X զորամասի հրամանատար Գրիգորի Խաչատուրովը դրանցից մեկը գրավադրել է բանկում եւ ստացել գումար․ խեղաթյուրվել է նշյալ գույքի իրական պատկանելիությունը։
Արփինե ՍԻՄՈՆՅԱՆ
