Հայկական կողմին պաշտոնական տեղեկություն փոխանցվե՞լ է՝ թուրքական կողմի հետ պայմանավորվածությունը՝ 2023-ի ամռան սկզբին, ցամաքային սահմանը երրորդ երկրների քաղաքացիների եւ դիվանագիտական անձնագիր կրող անձանց համար, բացելու պայմանավորվածությունը չեղարկվե՞լ է, թե՞ ուժի մեջ է մնում. այս հարցն այսօր ՀՀ ԱԺ-ում կայացած ասուլիսի ժամանակ լրագրողները տվեցին Սեւծովյան տնտեսական համագործակցության խորհրդարանական վեհաժողովի հայաստանյան պատվիրակության ղեկավար Բաբկեն Թունյանին եւ պատվիրակության անդամ Գեւորգ Պապոյանին:
Պատվիրակության անդամները, հիշեցնենք, մայիսի 4-5-ին Անկարայում մասնակցում էին Սեւծովյան տնտեսական համագործակցության խորհրդարանական վեհաժողովի լիագումար նիստին: Պատվիրակության հետ Անկարա էր մեկնել նաեւ ՀՀ ԱԺ նախագահ Ալեն Սիմոնյանը:
Գեւորգ Պապոյանը պատասխանեց՝ ինքն այդ պայմանավորվածության չեղարկման կամ չչեղարկման վերաբերյալ հավելյալ տեղեկություն չունի եւ հավելեց. «Մեր հանրային կյանքում շատ է քննարկվում՝ Հայաստանին ձե՞ռք է տալիս, որ հայ-թուրքական սահմանը բացվի. եթե Հայաստանին ձեռք չտա հայ-թուրքական սահմանի բացումը եւ դա ձեռք տա Թուրքիային միայն, Թուրքիան հայ-թուրքական սահմանը կբացի հինգ վայրկյանում, որովհետեւ Հայաստանը Հայաստան-Թուրքիա սահմանը չի փակել, սահմանը փակել է Թուրքիան, որովհետեւ դրանով Հայաստանին տնտեսապես ճնշում է, դրանով իրենք աջակցում են Ադրբեջանին եւ Թուրքիան դա երբեք չի թաքցրել»:
Իշխանական պատգամավորը պնդում է՝ այս իրողությունը ցույց է տալիս, որ նարատիվը, թե հայ-թուրքական սահմանի բացումը Հայաստանի համար ապոկալիպտիկ հետեւանքներ է ունենալու՝ պարզապես ծիծաղելի է եւ իրականության հետ աղերս չունի. «Այդ թեզը հիմարություն է»: Ինքն էլ համոզված պնդում է՝ հայ-թուրքական սահմանի բացումը բերելու է ՀՀ տնտեսության զարգացման, բիզնեսների ծաղկման, հարկերի եւ մարդկանց սոցիալական վիճակի էական ավելացման:
Կարդացեք նաև
Միաժամանակ, Գեւորգ Պապոյանը հավաստիացնում է՝ իրենց իշխանությունը չի շեղվում առանց նախապայմանների հայ-թուրքական հարաբերությունները կարգավորելու ուղուց եւ այդ հարցը ՀՀ պետական քաղաքականության օրակարգում է շարունակում մնալ: Քանի որ ՀՀ պետական քաղաքականությունն այդ ուղղությամբ վարում են վարչապետը եւ ԱԳՆ-ն, Գեւորգ Պապոյանը հորդորում է՝ հիմք ընդունել վարչապետի եւ ԱԳՆ-ի հայտարարությունները:
Նելլի ԳՐԻԳՈՐՅԱՆ
