Այսօր մեծ հաղթանակի օր է, Հայրենական մեծ պատերազմի հաղթանակի: Ուզում եմ խոսքս ուղղել ռուս զինվորներին, ռուս խաղաղապահներին, որոնք այստեղ կանգնած են մեր կողքին: Ադրբեջանցիները, տեղադրելով այս անցակետը, ձեր դեմ են դա արել: Նրանք ուզում են, որ դուք այստեղ չլինեք, որ պառակտեն ձեզ ամեն օր, որ դուք այստեղից դուրս գաք: Նրանք ամեն կերպ ուզում են, որ հայերը հիասթափվեն: Բայց դա չի լինելու: «Ո՛Չ Արցախի էթնիկ զտմանը» պահանջագրի և ստորագրահավաքի նախաձեռնող խմբի կողմից այսօր Ստեփանակերտի Վերածննդի հրապարակում կազմակերպած հանրահավաքում ունեցած ելույթում հայտարարեց «Մենք ենք, մեր սարերը» տարածքային զարգացման գործակալության համահիմնադիր, Արցախի Հանրապետության նախկին պետնախարար Ռուբեն Վարդանյանը:
«Մենք միասին անցել ենք Հայրենական մեծ պատերազմը, իրար կողք ենք հիմա: Ադրբեջանին չի հաջողվելու հասնել իր նպատակին և ամեն ձևով հանել խաղաղապահներին Արցախից: Վստահ եմ, որ դուք էլ եք դա հասկանում և կողք կողքի պիտի կանգնենք, որ դուք կատարեք ձեր պարտականությունները: Կատարեք այնպես, ինչպես հարկն է: Այո, գիտեմ, որ դժվար է, բայց դուք պարտավոր եք դա անել, իսկ մենք ձեր կողքին կկանգնենք»,-կոչ արեց Ռուբեն Վարդանյանը՝ միաժամանակ դիմելով միջազգային կազմակերպություններին, տարբեր երկրների ղեկավարներին. «Ու՞ր է ձեր արժանապատվությունը: Ադրբեջանը թքում է ձեր վրա և հայտարարում, թե չի ենթարկվելու ոչ մի դատարանի որոշման, չի ենթարկվելու ոչ մի պայմանագրի: Ինչ է դա: Արժանապատվություն չունե՞ք, Ո՞ւժ չունեք, չեք կարո՞ղ ասել` Ադրբեջան, դու ով ես, կատարիր քո պարտականությունները»:
Նրա խոսքով, միակ ճանապարհն այն է, որ պահպանենք մեր արժանապատվությունը, և ուրիշներն էր զգան իրենց մեղքն ու փոխեն վերաբերմունքը:
Կարդացեք նաև
«Մեր բոլոր ղեկավարները պետք է հասկանան, որ Հայրենական պատերազմի ժամանակ դու ղեկավար չես, դու ղեկավար-առաջնորդ ես: Ամեն խոսքդ, քայլդ, պահելաձևդ շատ կարևոր է մարդկանց համար: Մեզ մոտ շատ ուժեղ էներգիա է կուտակված, ես դա ամեն օր զգում եմ: Դա պահանջում է, որ մարդիկ, որոնք ունեն հնարավորություն, պատասխանատվություն վերցնեն և իսկապես մեզ բոլորիս միավորեն: Որ դառնանք մի գունդ, մի պատ, որը կպաշտպանի իր հայրենիքը»,-նշեց նա:
Լուսինե ՄԱՐԳԱՐՅԱՆ
