Զինված ուժերի ԳՇ պետի նախկին տեղակալ Տիրան Խաչատրյանն այսօր լրագրողների հետ զրույցում անդրադարձավ Տեղ գյուղի տարածք ադրբեջանական ուժերի ներխուժմանը։
Հարցին, թե ինչպե՞ս է գնահատում, որ բանակը չէր դիմադրել ադրբեջանական գործողություններին՝ Տիրան Խաչատրյանը պատասխանեց․ «Շատ վատ եմ գնահատում այն, որ Զինված ուժերի առաջ խնդիր դրված չէ կամ խնդիր դրված է այն մակարդակի, որն ի զորու չեն իրականացնել։ Ցանկացած հրամանատար՝ սկսած ջոկի հրամանատարից, հասկանում է, որ իր ենթակային կարող է այն տրամաբանության մեջ խնդիր առաջադրել, որն ի զորու կլինեն կատարել։ Եթե առաջադրված խնդիրը եղել է, եւ ի զորու չեն եղել կատարել, դա խնդիրն առաջադրողի պրոբլեմն է։ Եթե խնդիր առաջադրված չի եղել, իսկ այդ առաջադրողն ո՞վ էր եւ ինչո՞ւ չի առաջադրել, որտեղի՞ց է սկսվում այդ չառաջադրելու թելը։ Սրանք են հարցերը՝ ես չգիտեմ՝ խնդիր չի առաջադրվել, թե՞ առաջադրվել է, չի կատարվել»։
Տիրան Խաչատրյանի խոսքով՝ Տեղ գյուղ ներխուժած ադրբեջանցիներին հետ շպրտելու տարբերակներից մեկն էլ ուժով դա անելն է, բայց կան նաեւ քաղաքական ու դիվանագիտական մոտեցումներ, որոնց կիրառումը պարտադիր պահանջ է։ «Երբեւէ որեւէ մեկը, առավել եւս զինվորականը, միանգամից չի գնում այն քայլին, որը բախման կտանի կամ լարվածության մեծացման, էլ չեմ ասում լայնամասշտաբ պատերազմի։ Եթե այդ տարբերակները չեն աշխատում, եւ կա խնդիր, որ սա մեր տարածքն է կամ մեզ վստահված պատասխանատվության տեղամասն է, որի համար ես կյանքով պատասխանատվություն եմ կրում, ուրեմն պետք է դրան էլ գնալ»,- ասաց նա։
Ռոզա ՀՈՎՀԱՆՆԻՍՅԱՆ
