Ադրբեջանի արտգործնախարար Ջեյհուն Բայրամովը Լիտվայի իր գործընկեր Գաբրիելյուս Լանդսբերգիսի հետ հանդիպմանը կոչ է արել Հայաստանին ավելի մեծ ջանքեր ներդնել հարաբերությունների կարգավորման գործում:
«Մենք հայկական կողմին կոչ ենք անում ցուցաբերել բարի կամք և ավելի շատ ջանքեր ներդնել հարաբերությունների կարգավորման քննարկումներում բոլոր ուղղություններով»,- ասել է Բայրամովը:
Նրա խոսքով՝ չնայած երկկողմ շփումներում որոշակի դինամիկային՝ տարբեր ուղղություններով, մասնավորապես խաղաղության պայմանագրի նախագծի, պետական սահմանի սահմանազատման և տրանսպորտային հաղորդակցության վերականգնման շուրջ ձեռք բերված առաջընթացը «առայժմ չի բարելավել մեր սպասելիքները»:
Ըստ Ադրբեջանի ԱԳՆ հաղորդագրության՝ Բայրամովն իր գործընկերոջը տեղեկացրել է Հարավային Կովկասում հետպատերազմական իրավիճակի և տարբեր ուղղություններով Ադրբեջանի գործադրած ջանքերի մասին: Նա նաև բարձրացրել է ականների հարցը և նշել, որ դա «մարդու իրավունքների ակնհայտ խախտում է»:
Կարդացեք նաև
«Մենք հավատում ենք, որ երկու երկրների միջև հարաբերությունների կարգավորման լավագույն ճանապարհը հիմնվում է ինքնիշխանության և տարածքային ամբողջականության փոխադարձ ճանաչման վրա»,- ասել է Բայրամովը՝ հավելելով որ Ադրբեջանի դիրքորոշումն այդ հարցում «պարզ է, սկզբունքային և մշտական»:
Պատրաստեց Վիկտորյա ԱՆԴՐԵԱՍՅԱՆԸ
