«Վաշինգտոնում ի՞նչ են խոսում, ի՞նչ են քննարկում, եւ արդյոք Վաշինգտոնում Բլինքենի մասնակցությամբ եռակողմ հանդիպումը, նաեւ Լավրով-Բայրամով-Միրզոյան հանդիպումը նույն հարթակներն են, նույն հարցերն են քննարկում։ Եվ արդյոք սեղանին դրվա՞ծ է մի փաստաթուղթ, որը քննարկվում է»,- Ազգային ժողով-կառավարություն հարց ու պատասխանի ժամանակ վարչապետ Նիկոլ Փաշինյանին հարցրեց «Հայաստան» խմբակցության պատգամավոր Գեղամ Մանուկյանը։
Նիկոլ Փաշինյանն ասաց․ «Վաշինգտոնում քննարկվում է ճշգրիտ այն, ինչ ես նախորդ շաբաթ այս ամբիոնից ներկայացրել եմ։ Սեղանին կա փաստաթուղթ, թե՞ ոչ։ Այո, կա սեղանին փաստաթուղթ, կարող եք ծանոթանալ։ Այդ փաստաթղթի մեջ ոչ մի նորություն չեք գտնի, որովհետեւ այս փաստաթղթի մասին ասել եմ հրապարակային այս ամբիոնից։ Թեզերի մասով ասել եմ, տեքստային մանրամասներին կարող եք ծանոթանալ՝ եւ Ադրբեջանի ներկայացրածին, եւ մեր ռեակցիաներին ծանոթանալ»։
Նա նշեց՝ քանի որ բանակցություն է գնում, որեւէ պոզիտիվ ու նեգատիվ մեկնաբանություն ազդելու է ընթացքի վրա։ «Բայց ուզում եմ ասել, թե ես ինչ հանձնարարական եմ տվել մեր բանակցող թիմին։ Ես ասել եմ, որ այն թուղթը, որը դուք բանակցում եք, ես եմ ստորագրելու, եւ բանակցեք ազատ եւ դրված մեր քաղաքական ուղեգծի շրջանակներում եւ մեր հրապարակային արտահայտած կարծիքների շրջանակներում»,- ասաց նա։
Ռոզա ՀՈՎՀԱՆՆԻՍՅԱՆ
