«Ո՛չ Արցախի Հանրապետության էթնիկ զտմանը» նախաձեռնող խումբը Արցախը Հայաստանին կապող ճանապարհին վրանային պայքարի խաղաղ ձեւաչափ է ընտրել։ Երիտասարդները կոչ են անում բոլոր մտահոգ հայրենակիցներին միանալ իրենց նախաձեռնած պայքարին։ Նաեւ հայտարարում են, որ բողոքի գործողություններն անժամկետ են, պայքարելու են մինչեւ ադրբեջանական անցակետի հանվելը:
Համակարգող խմբի անդամներից Դավիթ Բաղիրյանը Aravot.am-ի հետ զրույցում նշեց, որ շնորհակալ է բոլոր այն կամավորներին, որոնք ապրիլի 28-ից սկսած միացել են իրենց խաղաղ գործողություններին՝ «Ոչ Արցախի Հանրապետության էթնիկ զտմանը» խորագրով:
«Մենք արդեն տեղեկացանք, որ ունենք բավականին աջակիցներ Մայր Հայաստանում, ինչը մեզ թեւեր է տալիս, կրկին ապացուցում է, որ մեր պայքարը շիտակ է: Ապրիլի 23-ից Ադրբեջանը խախտելով եռակողմ պայմանագիրը՝ Բերձորի միջանցքում ապօրինի աշխատանքներ է ծավալել եւ տեղադրել է անցագրագային կետ, պատճենահանող սարքավորումներ է բերել եւ այլն: Դա միտված է մեր դեմ, ուղղված է Արցախի Հանրապետության բնակիչների էթնիկ զտմանը եւ դա մեզ համար կարմիր գիծ է ու համար անթույլատրելի է»,-ասաց Դավիթ Բաղիրյանը՝ ներկայացնելով իրենց պահանջները:
Կարդացեք նաև
Նա հավելեց, որ եթե 7-օրյա ժամկետում հարցին լուծում չտրվի, ստիպված կլինեն համապատասխան գործողությունների դիմել՝ հայրենի հողում ապրելու իրավունքի համար: Ինչ վերաբերվում է այսօրվա խաղաղ գործողություններին՝ այս մասին էլ նշեց. «Երրորդ օրն է լծված էինք կազմակերպչական հարցերին, Արցախը Մայր Հայաստանին կապող Շուշի տանող հատվածում՝ «Զառին բաղ» կոչվող տեղանքում վրան եք տեղադրել Արցախի երիտասարդների նախաձեռնող խմբով, երրորդ օրն է այստեղ ենք 24-ժամյա ռեժիմով: Այս ակցիան շարունակվելու այնքան մինչեւ մեր պահանջը լուծվի: Ուզում եմ շեշտել, որ ցանկացած հայրենակցի ներդրումը մեզ համար շատ կարեւոր է, մենք պետք է շատանանք, պիտի լսելի դարձնենք մեր ձայնը եւ պահենք մեր հայրենիքը»:
«Ո՛Չ Արցախի էթնիկ զտմանը» շարժման լրատվական կապերի պատասխանատու Արշակ Աբրահամյանը մեզ հետ զրույցում հայտնեց, որ չնայած եղանակային պայմաններին, մարդիկ անձրեւանոցներով մասնակցում էին բողոքի գործողություններին:
« Վրանային պայքարը մեկնարկել է ստորագրահավաքի հաջորդ օրը, չէինք ցանկանում բավարարվել միայն ստորագրություններով, ուստի դրան զուգահեռ՝ իրավիճակին համապատասխան, մեր համակարգող խումբը սկսել է գործողություններ իրականացնել:
Բոլոր անհրաժեշտ միջոցներին եւ մեթոդներին դիմելու ենք, որոնցից մեկն այս պահին վրանային պայքարի միջոցով մեր ձայնը լսելի դարձնելն է: Ժողովրդի աջակցությունը շատ մեծ է, տեսնում ենք, որ Հայաստանի Հանրապետությունից կան արձագանքներ:
Քիչ առաջ տեղեկացանք, որ ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Թագուհի Թովմասյանն է նմանատիպ ակցիա իրականացնում: Նաեւ Հայաստանի Հանրապետության տարբեր վայրերում ստեղծվում են այդպիսի խմբեր, պայքարը դարձել է համահայկական, եւ ամեն ինչ գնում է ծրագրված՝ ըստ մեր ճանապարհային քարտեզի»:
Գոհար ՀԱԿՈԲՅԱՆ
Լուսանկարները՝ «Ոչ Արցախի Հանրապետության էթնիկ զտմանը» նախաձեռնության էջից:
