Ամերիկյան Միջազգային Հանրապետական ինստիտուտը (ՄՀԻ/ IRI) հրապարակել է սոցիոլոգիական հետազոտության տվյալները, որոնք վերաբերում են այս տարվա մարտին:
Ի թիվս այլնի, ըստ այդ հետազոտության, հարցվածների 52%-ը կարծում է, որ երկիրն ընթանում է սխալ ուղղությամբ, եւ ընդամենը 36%-ն է կարծում, որ ընթացքը ճիշտ ուղղությամբ է: Ըստ նույն աղբյուրի, ընդամենը 17%-ն է բավարարված երկրի ժողովրդավարացման տեմպերով, հարցվածների 42%-ը դժգոհ է, իսկ 35%-ն ընդհանրապես որևէ ժողովրդավարական փոփոխություն չի տեսնում:
IRI-ի կողմից իրականացված սոցիոլոգիական հետազոտության տվյալների համաձայն, Նիկոլ Փաշինյանի վարկանիշը 14% է, եւ եթե ընտրությունները կայանային այս կիրակի, ՔՊ-ին ձայն կտար ընդամենը 21% -ը, իսկ Երևանում այդ ցուցանիշը 17% է:
Aravot.am-ը այս պատկերի վերաբերյալ մեկնաբանություն խնդրեց քաղաքական վերլուծաբան Վիգեն Հակոբյանից: «IRI-ը բավականին լուրջ կառույց է, դա ամերիկյան Միջազգային Հանրապետական ինստիտուտն է, ուստի պետք է այս թվերին լուրջ վերաբերվել, թեեւ ամեն դեպքում այդ սոցհարցումն արվել է հայաստանյան որեւէ կազմակերպության կողմից, որովհետեւ իրենք պատվեր են տալիս, եւ սոցիոլագիական կազմակերպություն չեն: Բոլոր թվերը բավականին ցածր ցուցանիշներ են արտացոլում իշխանության վարած քաղաքականության արդյունավետության առումով: Այլ կերպ ասած՝ դժգոհությունը բոլոր ոլորտներում բարձր է իշխանության վարած քաղաքականության, մոտեցումների եւ առավել եւս արդյունքների նկատմամբ:
Կարդացեք նաև
Սա նշանակում է , որ հասարակության մեջ հասունացել է բողոքական լուրջ ալիք, պոտենցիալ: Փողոցում դա չի արտահայտվում, որովհետեւ առաջնորդության խնդիր կա, թե ովքեր պետք է այդ բողոքը կառավարեն: Բազմիցս ասել եմ, որ ընդհանրապես չեմ հավատում, երբ ասում են՝ ինքնաբուխ բողոքի գործողություններ են:
Այդ ինքնաբուխի դեպքում կամ իրականում կա որեւէ շարժիչ ուժ, առաջնորդ, որը ինչ-որ մի պահի չի ուզում երեւալ, կամ եթե ինչ-որ ինքնաբուխ շարժում է սկսվում, շատ արագ, ժամերի ընթացքում հայտնվում է առաջնորդ: Դրա համար ուզում եմ ասել, որ IRI –ի ցուցանիշները փաստում են, որ կա բողոքական պոտենցիալ, որը կարող է ցանկացած պահի պայթել, դա կլինի փողոցային գործողությունների, բունտի տեսքով, խաղաղ կամ ոչ խաղաղ՝ կախված նրանից, թե ինչ առաջնորդ ի հայտ կգա, եւ առաջնորդությունը որտեղից կլինի:
Հետազոտության արդյունքները, որը համարում ենք մեր ժողովրդի կարծիք, եւ այն պատկերը, որ տեսնում ենք կենցաղում ու փողոցում, կարծես դիսոնանսի մեջ են: Բայց այդ դիսոնանսը, ինչպես արդեն նշեցի, պայմանավորված է նրանով, որ այս պահին որեւէ քաղաքական ուժ կամ հոսանք իր վրա դեռեւս չի վերցնում առաջնորդելու գործառույթը: Այսինքն, բողոքի այս ալիքը սպասում է իր առաջնորդին»,-ընդգծեց Վիգեն Հակոբյանը:
Գոհար ՀԱԿՈԲՅԱՆ
