Ազգային ժողովում Դատախազության 2022 թվականի գործունեության մասին հաղորդման քննարկման ժամանակ «Հայաստան» խմբակցության պատգամավոր Արծվիկ Մինասյանը հարց ուղղեց գլխավոր դատախազ Աննա Վարդապետյանին ոստիկանական բաժանմունքներում քաղաքացիների խոշտանգումների ահազանգերի մասին։ Նա նաեւ հիշատակեց «Հանրային ձայն» կուսակցության նախագահ Արտակ Գալստյանի խոշտանգման մասին ահազանգերը։
Աննա Վարդապետյանը Արտակ Գալստյանի գործի վերաբերյալ նշեց․ «Հանցագործության մասին հաղորդում էր ներկայացվել փաստաբանի կողմից, որն ուղարկվել է վարույթն իրականացնող մարմնին։ Դատախազությունը նախաքննության նկատմամբ հսկողություն եւ վերահսկողություն իրականացնելու գործառույթ ունի, եւ մեզ ուղարկվող վարույթներն ուղարկում ենք քննչական ենթակայության։ Այս մասով որեւէ գնահատական հնչեցնել չեմ կարող, որովհետեւ մի քանի օր առաջ ուղարկված հաղորդում է, որը պետք է ստուգվի»։
«Տիկին Վարդապետյան, խոշտանգումների մասով գնահատական էի ակնկալում ձեզանից, որ երբ իրավասու մարմիններում է կատարվում, դա ոչ միայն անթույլատրելի է․․․ Անկախ նրանից, թե անձն ով է։ Այս դատապարտումն էի ակնկալում ձեզնից եւ նաեւ քրեական վարույթի նախաձեռնման շրջանակներում օբյեկտիվ գնահատական»,- արձագանքեց Արծվիկ Մինասյանը։
Ռոզա ՀՈՎՀԱՆՆԻՍՅԱՆ
