Համաշխարհային պարենային ապրանքների գների նվազման արդյունքում Հայաստանում գնաճի զամբյուղի մեջ էական կշիռ ունեցող ապրանքների գները որոշակի նվազման միտում են ցույց տալիս։ Գնաճի նվազման պատճառ է նաեւ բազային էֆեկտը, քանի որ անցած տարի գնաճի բավականին բարձր բազա է գրանցվել։ Այս մասին այսօր լրագրողների հետ զրույցում ասաց Կենտրոնական բանկի նախագահ Մարտին Գալստյանը։
Նշենք, որ 2023-ի մարտին տասներկուամսյա գնաճը կազմել է 5,4։
Գալստյանի խոսքով՝ «Գնաճի դեմ մեր պայքարը դեռեւս վերջնականապես չենք հաղթահարել, նախ այն պատճառով, որ արտաքին պահանջարկով պայմանավորված՝ ծառայությունների գները հետեւողականորեն աճում են։ Այսինքն, եթե ապրանքերի պարագայում մենք տեսնում ենք, որ մեծ գնանկում կա, որն ընդհանուր գնաճը որոշակի ժամանակ անց, կարճաժամկետում բերելու է նրան, որ մեր երկրում գնաճը ավելի ցածր է լինելու, քան ԿԲ թիրախը, բայց տեսնում ենք, որ ծառայությունների ոլորտում գնաճն ավելի բարձր է, քան մեր թիրախը։ Մենք ամսական 6%, 7%, 8% գնաճ ենք ունեցել, տարեկան 12% գնաճ՝ որոշակի ծառայությունների մասով։ Այս ոլորտի գնաճը պայմանավորված է արտաքին շատ ուժեղ պահանջարկով, ինչպես նաեւ աշխատավարձերի աճն է ազդում գնաճի վրա»։
Գալստյանի խոսքով՝ գնաճային սպասումները շարունակում են մնալ բավականին բարձր։
Կարդացեք նաև
Անցած տարի 12.5% տնտեսական աճին նպաստել են ծառայությունների, առեւտրի ու շինարարության ոլորտները, մասամբ նաեւ մշակվող արդյունաբերությունը, գյուղատնտեսությունում էական աճ չի եղել։ ԿԲ կանխատեսմամբ՝ այս տարի էլ աճին նպաստելու են հիմնականում ծառայությունների եւ շինարարության ոլորտները։
Նելլի ԲԱԲԱՅԱՆ
