2023-ի մարտին տասներկուամսյա գնաճը կտրուկ նվազել է, կազմելով 5,4 %։ Այս մասին այսօր հրավիրված ասուլիսում ասաց Կենտրոնական բանկի նախագահ Մարտին Գալստյանը։
ԿԲ խորհուրդն այսօր որոշել է անփոփոխ թողնել վերաֆինանսավորման տոկոսադրույքը՝ 10.75%։
Հայաստանի գործընկեր երկրներում տասներկուամսյա գնաճը շարունակում է նվազել, սակայն, ինչպես Գալստյանը նշեց, պահպանվող բարձր պահանջարկի եւ աշխատաշուկայից ածանցվող ճնշումների ազդեցության հետեւանքով ընդհանուր գնաճային միջավայրը մնում է բարձր։
ԿԲ կանխատեսումներով՝ համաշխարհային տնտեսությունից Հայաստանի տնտեսության վրա գնաճային ազդեցությունները շարունակում են թուլանալ։ Այս տարեսկզբին, ըստ Գալստյանի, Հայաստանում տնտեսական ակտիվությունը բարձր է, ինչին նպաստել է ծառայությունների եւ շինարարության ոլորտներում արձանագրված բարձր աճը։
Կարդացեք նաև
«Իրականացված զսպող դրամավարկային քաղաքականության դրամի արժեւորման եւ արտաքին հատվածից գնաճային ազդեցությունների թուլացման արդյունքում տասներկուամսյա գնաճը Հայաստանում նվազում է։ Այնուամենայնիվ, բարձր պահանջարկն ու գնաճային սպասումները դեռեւս շարունակում են նպաստել աշխատավարձերի եւ առանձին ապրանքախմբերում եւ ծառայություններում բարձր գնաճի պահպանմանը»,-ասաց Գալստյանը։
ԿԲ կանխատեսումների համաձայն, առաջիկայում գնաճը կնվազի, այն տարեվերջին կկայունանա նպատակային 4%-ի շուրջ։
Նելլի ԲԱԲԱՅԱՆ
