44-օրյա պատերազմում անմահացած Հայկ Մելիքյանի մայրը՝ Նաիրա Մելիքյանը, «Հայելի» ակումբում հայտարարեց, որ անհրաժեշտ է բոլորով միանալ ցանկացած նախաձեռնության, որն ուղղված է իշխանության դեմ։ Նա հիշեցրեց, որ այն, ինչ կատարվել է հայրենիքի համար նահատակված, այդ թվում նաեւ ողջակիզված 15 զինվորների ծնողների հետ, բումերանգի էֆեկտով կատարվելու է նաեւ դրա մեղավորների հետ։ Տիկին Մելիքյանը համոզված է, որ Հայաստանում իշխանությունը բռնազավթված է եւ այդ բռնազավթողները իրենց սեւ գործն իրականացնում են Քրիստոնեությանը հակասող ինչ-որ ծեսերով։
Մասնավորապես, երբ COVID-ի պատճառով արգելեցին այցելությունը Ծիծեռնակաբերդ, ինչ-որ կոդով ծես իրականացրին ու հազարավոր ապրող հայ մարդկանց անունները գրեցին Ցեղասպանության հուշահամալիրի՝ տապանաքարի վերածված քարե պատերին։ «Այսօր մենք դրա դեմ պետք է պայքարենք խաչով, եկեղեցիով։
Եվ պատահական չէ, որ եկեղեցին ակնհայտ արտահայտում է իր դիրքորոշումը սրանց վերաբերյալ։ Այո, մենք պետք է մեր եկեղեցով շրջապատված ու մեր Վեհափառ հոր, արքեպիսկոպոս Միքայել Աջապահյանի, սրբազան Բագրատ Գալստանյանի, մեր մյուս հոգեւոր այրերի առաջնորդությամբ պայքարենք։
Սրանք, որ հիմա ուզում են վերացնել մատաղի քրիստոնեական ծիսակարգը, իրականում իրենք մատաղ արեցին այն 15 լուսավոր տղաներին։ Ես այսօր մասնակցեցի Գեւորգ Գեւորգյանի նախաձեռնությանը։ Նա կազմակերպում է յոթնօրյա ուխտագնացություն յոթ եկեղեցի։ Այսօր գնացինք Սուրբ Գրիգոր Լուսավորիչ եկեղեցի, մեղքերի համար ապաշխարություն խնդրեցինք եւ ստացանք եկեղեցու օրհնությունը։
Կարդացեք նաև
Վաղը 11։00-ին լինելու ենք Սուրբ Սարգիս եկեղեցում։ Ժողովուրդ, հավանաբար այս իշխանությունն էլ Աստծուց է, բայց որպես պատիժ մեր մեղքերի։ Անհրաժեշտ է միանալ այս ուխտագնացությանը, խոստովանել մեղքերը։ Միայն հավատքով ու եկեղեցով հնարավոր է սրանց հեռացնել»,-ասաց տիկին Նաիրան եւ վստահեցրեց, որ իրենց քաղաքացիական նախաձեռնությունները եւ ակցիաները մշտապես շարունակվելու են։ «Մենք գործ ունենք այնպիսի երեւույթի հետ, որի դեմ պետք է պայքարել հնարավոր բոլոր միջոցներով»,-ասաց Զոհված Հայկ Մելիքյանի մայրը՝ Նաիրա Մելիքյանը։
Աշոտ ՀԱԿՈԲՅԱՆ
