Ռուսաստանի ԱԳՆ-ն հայտարարություն է տարածել հայ- ադրբեջանական կարգավորման գործընթացի վերաբերյալ.
Լուրջ մտահոգություն ենք հայտնում Լեռնային Ղարաբաղում Ռուս խաղաղապահ զորամիավորման պատասխանատվության գոտում, հայ-ադրբեջանական շփման գծում իրավիճակի և պաշտոնական Բաքվի ու Երևանի միջև երկխոսության կապակցությամբ:
Ծայրահեղ մտահոգությամբ արձանագրում ենք հրադադարի ռեժիմի խախտման և տարբեր տեսակի միջադեպերի թվի աճ, ինչի հետևանքով պարբերաբար առաջ են գալիս զոհեր երկու կողմերում: Ոչ պակաս վտանգավոր ենք համարում Ադրբեջանի և Հայաստանի հանրային տիրույթում մեղադրական և թշնամական հռետորաբանության ավելացած աստիճանը: Ապրիլի 23-ի վերջին իրադարձությունների համատեքստում նշում ենք, որ անընդունելի են ցանկացած տեսակի քայլեր, որոնք խաթարում են Ռուսաստանի, Ադրբեջանի և Հայաստանի առաջնորդների՝ 2020թ. նոյեմբերի 9-ի եռակողմ հայտարարության հիմնարար դրույթները՝ անկախ նրանից՝ խոսքը Լաչինի միջանցքի գործունեության ռեժիմի չհամաձայնեցված փոփոխության մասին է, թե այն խաղաղության օրակարգին չնպաստող նպատակներով օգտագործելու փորձերի մասին:
Կոչ ենք անում կողմերին անհապաղ վերադառնալ առկա պայմանավորվածություններին: Ելնում ենք նրանից, որ ցանկացած պարագայում տեղի բնակչությունը չպետք է տառապի, և չպետք որևէ խոչընդոտներ ստեղծվեն նրա կենսագործունեության համար:
Կարդացեք նաև
Կարծում ենք, որ ծագած խնդիրներից շատերն արդյունք են բազմամսյա անգործության և Ռուսաստանի, Ադրբեջանի և Հայաստանի ղեկավարների միջև եռակողմ համաձայնագրերի բոլոր, այդ թվում տրանսպորտային հաղորդակցությունների ապաշրջափակման, հայ-ադրբեջանական սահմանի սահմանազատման գործընթացի մեկնարկի և Ադրբեջանի և Հայաստանի միջև խաղաղության պայմանագրի պարամետրերի համաձայնեցման ուղղություններով բանակցային գործընթացում առաջընթացի բացակայության: Ակնկալում ենք, որ Բաքուն և Երևանը քաղաքական կամք կդրսևորեն և մոտ ապագայում կկարողանան հաղթահարել այդ բացասական միտումը։
Ռուսական կողմը պատրաստ է բոլոր անհրաժեշտ օգնություն ցուցաբերել իրեն հարազատ Ադրբեջանին ու Հայաստանին ինչպես քաղաքական մակարդակում, այնպես էլ «տեղում»՝ ռուսական խաղաղապահ զորամիավորման հրամանատարության մասնակցությամբ։
Մենք նաև զգուշացնում ենք արտաքին արևմտյան խաղացողներին և նրանց պատեհապաշտ օրակարգով աշխատող տեղական ռուսաֆոբ տարրերին զերծ մնալ իրավիճակը սրելու փորձերից, այդ թվում՝ Ռուսաստանի դեմ վարկաբեկիչ արշավի միջոցով:
Պատրաստեց Վիկտորյա ԱՆԴՐԵԱՍՅԱՆԸ
