«Հայրենիք» կուսակցության նախագահ Արթուր Վանեցյանն այսօր Ծիծեռնակաբերդում հայտարարեց, որ պետք է հասնենք նրան, որ միջազգային հանրությունը ճանաչի եւ դատապարտի Հայոց ցեղասպանությունը եւ պետք է հզորանանք, որ այլեւս որեւէ մեկի մտքով չանցնի, որ կարող է հայ ազգին ցեղասպանության ենթարկել:
Խոսելով ներքաղաքական խնդիրների մասին՝ նա ասաց. «Օրվա իշխանությունների գործունեությունը մեկնաբանելը անշնորհակալ գործ է, որովհետեւ մենք հասկացանք, որ այս մարդիկ գործում են տրամաբանությունից դուրս, սպասարկում են, ցավոք սրտի, ոչ թե ՀՀ-ի շահը, հայ ժողովրդի շահը, այլ բոլորի շահը, բացի Հայաստանից ու Արցախից: Մենք պետք է հասկանանք՝ Թուրքիան եւ Հայաստանը արդյոք ուզո՞ւմ են եւ կարո՞ղ են խաղաղ ապրել մեր հետ: Մենք ականատես ենք եղել բազմիցս, որ ադրբեջանցիք սպանում են մարդկանց միայն նրա համար, որ հայ են, տարեց, քաղաքացիական մարդկանց սպանում են՝ բացառապես ազգային պատկանելության համար»:
Հարցին՝ այս իրավիճակում արժե՞ ժողովրդին ապստամբության պատրաստել՝ հաշվի առնելով սահմանային իրավիճակը, Արցախում տիրող իրավիճակը՝ Վանեցյանը պատասխանեց. «Իսկ ի՞նչ անենք, համակերպվենք, գնանք զոհասեղանի՞ն բոլորս»:
Նա ասաց, որ 2019-ի սեպտեմբերից, երբ հրաժարական է տվել ԱԱԾ տնօրենի պաշտոնից, ակտիվ պայքարում է, բայց, ցավոք, հանրության կողմից արդյունքներ չկան. «Այս իշխանությունն ամեն ինչ անում է, որ մնա իշխանության»:
Կարդացեք նաև
Հռիփսիմե ՋԵԲԵՋՅԱՆ
