«Ինչպես երեկ հայտարարել է ԱՄՆ պետքարտուղարությունը, Ադրբեջանի կողմից անցակետի տեղադրման կապակցությամբ մենք մտահոգություն ենք հայտնել, որովհետեւ դա խաթարում է խաղաղության գործընթացը»,-Ծիծեռնակաբերդի հուշահամսլիրում, լրագրողների հետ զրույցում, այսօր ասաց Հայաստանում ԱՄՆ դեսպան Քրիստինա Քուինն՝ անդրադառնալով Հայաստանը Կոռնիձորից Արցախին կապող Հակարի կամրջի՝ Ադրբեջանի կողմից փակմանը եւ պատասխանելով հարցին՝ ի՞նչ է անում միջազգային հանրությունը՝ կանխելու համար արցախահայության դեմ նախապատրաստվող ցեղասպանությունը:
«Այս պահին մենք ցանկանում ենք, որպեսզի կողմերի միջեւ լինեն բանակցություններ եւ խաղաղության գործընթացին մենք պատրաստ ենք աջակցել: Ցանկացած բռնության կիրառում, ցանկացած սադրիչ գործողություն խաթարում է խաղաղության գործընթացը, մենք փորձում ենք առաջ շարժվել, փորձում ենք ջանքեր գործադրել խաղաղության գործընթացն առաջ տանելու ուղղությամբ»,-ասաց դեսպան:
Լրագրողի ճշտող հարցին՝ այն, ինչ տեղի է ունենում Արցախի ժողովրդի նպատմամբ, չե՞նք կարող բնորոշել հենց որպես ցեղասպանություն՝ դեսպանը պատասխանեց. «Այս պահին ես նման որակավորում տալու որեւէ իրավասություն չունեմ»:
Պատասխանելով ԱՄՆ կողմից Ադրբեջանի նկատմամբ պատժամիջոցներ կիրառելու մասին հարցին՝ տիկին դեսպանն ասաց. «Այս պահին ԱՄՆ կողմից Ադրբեջանի նկատմամբ կիրառված պատժամիջոցներ չկան, իսկ թե ի՞նչ կանենք մենք ապագայում, այդ մասին ես չեմ կարող որեւէ մեկնաբանություն տալ»:
Կարդացեք նաև
Նելլի ԳՐԻԳՈՐՅԱՆ
