Ազատ գյուղի զինվորական կացարանում զոհված զինծառայողների ծնողները փակեցին Ամիրյան փողոցը:
Զոհվածների ծնողները, հիշեցնենք, այսօր առավոտից ցույց էին անում կառավարության շենքի մոտ՝ վարչապետ Նիկոլ Փաշինյանի եւ պաշտպանության նախարար Սուրեն Պապիկյանի հետ հանդիպման պահանջով: Նրանք փակել էին Տիգրան Մեծ պողոտան, ապա բացեցին այն, քանի որ ոստիկանները տեղեկացրին, որ իրենց պահանջը փոխանցվել է կառավարության ներկայացուցիչներին: Ավելի ուշ ծնողները փակել էին Ամիրյան փողոցը:
Կառավարության նիստից հետո Նիկոլ Փաշինյանը հեռացավ՝ առանց ծնողների հետ հանդիպելու, չնայած ծնողներին փոխանցվել էր, որ հանդիպման պահանջը վարչապետին ու պաշտպանության նախարարին փոխանցվել է։
Ծնողների ներկայացուցիչ, փաստաբան Նորայր Նորիկյանը լրագրողների հետ զրույցում ասաց, որ Փաշինյանի խորհրդրականներից մեկը կկապվի ծնողներից Արման Բարսեղյանի հետ, ինչից հետո պարզ կդառնան հետագա անելիքները։
Կարդացեք նաև
«Ինձ զարմացնում է այս համառությունը, թե ինչո՞ւ են նախարարը եւ վարչապետը ձեռնպահ մնում հանդիպումից։ Քննությունն այստեղ խոչընդոտ չի կարող լինել։ Հենց իրենք այս երեք ամսում պետք է հանդիպում նախաձեռնեին, ծնողներից ներողություն խնդրեին, որ խաղաղ պայմաններում են զոհվել զինվորները»,- ասաց փաստաբանը:
Նելլի Գրիգորյան
