«2018թ․-ին իշխանության եկածները խաբեցին ժողովրդին, թե սիրում են, խոնարհվում եւ հպարտանում բոլորով։ Քաղաքացուն հռչակեցին հպարտ, հռչակեցին երեք միլիոն վարչապետերից մեկը, բայց սարքեցին տուգանքի մատերիալ, իսկ հազարավոր երիտասարդների «հաղթելու ենք» կարգախոսի ներքո եւ «Նիկոլ՝ դավաճան» որակումից խուսափելու համար դարձրին պատերազմի զոհ»,-ԱԺ արտահերթ նիստում կառավարության ծրագրի կատարման 2022թ․-ի ընթացքի մասին զեկույցի քննարկման ժամանակ այսօր հայտարարեց «Հայաստան» խմբակցության պատգամավոր Արեգնազ Մանուկյանը։
Նա շարունակեց․ «Ադրբեջանական բանտերում տանջվող մեր գերիների մասին մոռացել են, քանի ինչպես իրենք են ասել՝ թող մի քիչ համբերեն։ Հետո էլ ասեցին, թե գերիներն իրենց համար գոյություն չունենքշ։ Բերեցին պատերազմ, պարտություն, սուգ, հայրենիքին որդի տված մորը Եռաբլուրում քաշքշեցին, իսկ հղի Սոնային ու նրա դեռ չծնված երեխային «ժող ջան»-ի սիրելին իր ավտոշարասյունով սպանեց եւ առանց կանգնելու՝ շարունակեց ընթացքը։ Արմեն Գրիգորյանին դատարանում հասցրին մահվան դուռը։ ԱԺ նախագահը թքում է քաղաքացու վրա եւ մնում անպատիժ։ Ներքնաշորով արագաչափ փակողներ եկան իշխանության եւ ավելացրին արագաչափերի թիվը, մի մասն էլ գնաց արտերկիր՝ դառնալով օգտագործված մատերիալ։ Մի մասն էլ դարձել է դոլարային միլիոնատեր»։
Արեգնազ Մանուկյանի խոսքով՝ սուտ է Փաշինյանի պնդումը, թե Արցախն արդեն իսկ հանձնված էր մինչեւ իր իշխանության գալը․ «Այս իշխանությունը խաբել է։ Այն լեգիտիմ չէ եւ պետք է հեռանա ժողովրդական նոր շարժմամբ»։
Լուիզա ՍՈՒՔԻԱՍՅԱՆ
