«Այսօր ադրբեջանցին ավելի շուտ է բարձրանում մեր սահմանները, ինչո՞ւ ենք ուշացնում։ Չէ՞ որ ունենք ինժեներական, շինարարական մեծ ներուժ։ Եղել եմ Տեղ-Կոռնիձոր հատվածում, որտեղ ասֆալտը մեկ շերտով է։ Ի՞նչ քաղաքական պայմանավորվածությունների շրջանակում են նշանակվել ճանապարհի ժամկետներ։ Ապրիլի մեկին պետք է ավարտվեր, բայց այդ ճանապարհը մինչեւ հիմա պատրաստ չէ»,- ԱԺ արտահերթ նիստում կառավարության ծրագրի կատարման 2022թ․-ի ընթացքի մասին զեկույցի քննարկման ժամանակ այսօր տարածքային կառավարման եւ ենթակառուցվածքների նախարար Գնել Սանոսյանին հարցրեց «Հայաստան» խմբակցության պատգամավոր Սեյրան Օհանյանը։
Գնել Սանոսյանը պատասխանեց․ «Կար որոշակի պայմանավորվածություն, որ ապրիլի մեկից երթեւեկությունը պետք է տեղափոխվեր նոր ճանապարհի վրա։ Այդ գրաֆիկով գնացել ենք հետեւյալ կերպ․ ապրիլի մեկի դրությամբ ճանապարհը երթեւեկելի պետք է դարձնեինք, ինչը կարողացանք անել։ Բայց ոչ ամբողջապես։ Լրիվ պատրաստ կլինի մայիսի վերջին՝ եռաշերտ ասֆալտով, ջրահեռացման համակարգերով։ Կարծում եմ՝ մայիսի վերջին պատրաստ կլինի»։
Լուիզա ՍՈՒՔԻԱՍՅԱՆ
