Ազգային ժողովում այսօր լրագրողների աշխատանքի սահմանափակման հերթական դեպքն է գրանցվել։ Խորհրդարանում հավատարմագրված Factor TV-ի լրագրողը փորձել է լրագրողների համար նախատեսված օթյակից բջջային հեռախոսով տեսանկարահանել ԱԺ դահլիճում գտնվող Նիկոլ Փաշինյանին։ Սակայն, նկարահանումը խոչընդոտվել է Նիկոլ Փաշինյանի անվտանգության աշխատակցի կողմից։ Նա, մասնավորապես, արգելել է Factor TV-ի լրագրողին վարչապետին նկարահանել խոշոր պլանով՝ zoom-ով։
Երբ հետաքրքրվել ենք, թե սահմանափակումները որ օրենքով են կարգավորվում, ԱԱԾ աշխատակիցը անտրամաբանական պատասխան է տվել՝ նշելով, թե դա Նիկոլ Փաշինյանի անձնական տարածքն է։ Սակայն, նշենք, որ փորձել ենք նկարահանել Փաշինյանի՝ բոլորի համար անզեն աչքով տեսանելի արտաքին տեսքը։ Չենք փորձել ֆիքսել նրա համակարգչի, հեռախոսի էկրանները, ինչպես նաև՝ սեղանին դրված փաստաթղթերը։
Արձանագրենք, որ այսպիսի սահմանափակման մեր պրակտիկայում առաջին անգամ ենք հանդիպում, և այն հաջորդել է վերջին շրջանում խորհրդարանի դահլիճից տեսանյութերի տարածմանը, որտեղ վարչապետ Փաշինյանի ձեռքին թզբեհ է։
Այսօր էլ ԱԺ-ում հավատարմագրված օպերատորներին և լուսանկարիչներին զգուշացրել են Փաշինյանին նկարահանելիս շատ չմոտենալ՝ կրկին առանց հիմնավորման։ Հիշեցնենք, որ խորհրդարանի շենքում 2021 թվականից՝ Ալեն Սիմոնյանի ԱԺ նախագահ ընտրվելուց հետո, լրագրողների տեղաշարժը սահմանափակող խստացված ռեժիմ է մտցվել։
Կարդացեք նաև
Լրագրողները նախկինի նման չեն կարողանում ազատորեն տեղաշարժվել շենքի տարածքում, ինչն էլ բացասաբար է անդրադառնում լուսաբանումների որակի վրա։ Այս թեմայի շուրջ Factor.am-ը մեկնաբանություն խնդրեց ԱԺ աշխատակազմի ղեկավար Դավիթ Առաքելյանից, թե ինչո՞ւ է ԱԱԾ աշխատակիցը գրաքննում լրագրողի աշխատանքը։ Նա առաջարկեց հարցերն ուղղել գրավոր։ Factor.am-ն արդեն իսկ գրավոր հարցում է հղել ԱԺ համապատասխան ստորաբաժանման պատասխանատուին։
