«Ամերիկայի ձայն». Ամերիկյան The New York Times պարբերականը ապրիլի 18-ին իր «Ռուսաստանը, շրջանցելով պատժամիջոցները, ներմուծում է արևմտյան ռազմականտեխնոլոգիաներ» վերնագրով հոդվածում առանձնացրել է Հայաստանը՝ որպես էլեկտրոնային չիպեր ու ռազմական նշանակության էլեկտրոնային այլ ապրանքներ դեպի Ռուսաստան արտահանող երկիր: Թերթի պնդմամբ՝ «Ուկրաինայում սկիզբ առած պատերազմից հետո Ռուսաստանը սկսել է մի շարք ռազմական նշանակության ապրանքատեսակներ ներմուծել Հայաստանի և Ղազախստանի օգնությամբ՝ շրջանցելով պատժամիջոցները»
The New York Times-ը վկայակոչում է ամերիկյան հարկային ծառայությունների և առևտրի նախարարության աշխատակիցների մարտի 24-ի խորհրդակցության ժամանակ օգտագործված սլայդային նյութերը, որոնք հայտնվել են թերթի տրամադրության տակ։
Թերթը գրում է, որ «ինչպես ցույց են տալիս մարտի հանդիպման փաստաթղթերը, ԱՄՆ-ի և եվրոպացի պաշտոնյաներն ավելի ու ավելի են անհանգստանում, որ Ռուսաստանը ձեռք է բերում ամերիկյան և եվրոպական ապրանքներ՝ դրանք ներմուծելով Հայաստանի, Ղազախստանի և Կենտրոնական Ասիայի այլ երկրների միջով:
ԱՄՆ Արդյունաբերության և անվտանգության բյուրոյի կնիքով նշված մեկ փաստաթղթում նշվում է, որ 2022 թվականին Հայաստանն ԱՄՆ-ից ներմուծել է 515 տոկոսով ավելի շատ չիպեր և պրոցեսորներ, իսկ Եվրամիությունից՝ 212 տոկոսով ավելի, քան 2021 թվականին։ Այնուհետև Հայաստանն այդ նույն ապրանքների 97 տոկոսը արտահանել է Ռուսաստան, ասվում է փաստաթղթում»:
Կարդացեք նաև
The New York Times-ի պնդմամբ՝ ներկրված սարքավորումները կարևոր նշանակություն ունեն Ռուսաստանի ռազմական արդյունաբերության՝ հատկապես հրթիռների արտադրության ոլորտում։
Ըստ թերթի՝ էլեկտրոնային չիպերի հասանելիության արգելափակումը Ռուսաստանի առջև լուրջ մարտահրավեր էր, և Միացյալ Նահանգներն ու Եվրոպան դեռևս վերջնական հաղթանակ չեն տոնել այս հացում: Թեև զենք արտադրելու Ռուսաստանի կարողությունը նվազել է ավելի քան մեկ տարի առաջ սահմանված արևմտյան պատժամիջոցների պատճառով, այն դեռևս ձեռք է բերում բազմաթիվ էլեկտրոնային բաղադրիչներ շրջանցային ուղիներով:
«Արդյունքը աղետալի է. այն ժամանակ, երբ Միացյալ Նահանգները և Եվրամիությունը շարունակում են զենքի մատակարարումը ուկրաինացիներին, որպեսզի նրանք շարունակեն պայքարել Ռուսաստանի դեմ, նրանց (արևմտյան) սեփական տեխնոլոգիան օգտագործվում է Ռուսաստանի կողմից՝հակահարված տալու համար:
Ամերիկացի պաշտոնյաները պնդում են, որ 38 այլ կառավարությունների հետ համագործակցությամբ իրենց սահմանած լայնածավալ պատժամիջոցները լրջորեն վնասել են Ռուսաստանի ռազմական կարողությունները և բարձրացրել են Ռուսաստանի համար անհրաժեշտ մասերը ձեռք բերելու ծախսերը…
ԱՄՆ-ից և նրա դաշնակիցներից չիպերի ուղղակի վաճառքը Ռուսաստանին հասցվել է զրոյի: Ամերիկացի պաշտոնյաներն ասում են, որ Ռուսաստանն արդեն սպառել է իր ամենաճշգրիտ սպառազինությունների համար մատակարարված բաղադրիչների մեծ մասը և ստիպված է փոխարինել ավելի ցածրորակի կամ կեղծ մասերով, որոնք ավելի քիչ ճշգրիտ են դարձնում իր զինատեսակները»:
Թերթը մեջբերում է նաև Conflict Armament Research անկախ խմբի հրապարակած զեկույցը, որն ուսումնասիրել է ռազմի դաշտից հայտնաբերված ռուսական սպառազինությունը ու բացահայտել Ռուսաստանի կողմից արևմտյան արտադրության չիպերի օգտագործման դեպքեր:
