Տեղ համայնքի ավագանու անդամ Մասիս Զեյնալյանը պատմել էր, որ Սյունիքի նախկին մարզպետ, Պաշտպանության նախարարի խորհրդական Մելիքսեթ Պողոսյանը աշխարհազորայինների ժողով է արել, որին ինքը ներկա չի էլ եղել: Զեյնալյանը չի գնացել՝ ասելով, որ չի կարող կանգնել պարտված հրամանատարի կողքին։ Նրան ծեծի են ենթարկել ու մեղադրում է Մելիքսեթ Պողոսյանին:
Այս առնչությամբ այսօր լրագրողների հետ զրույցում ԱԺ պաշտպանության եւ անվտանգության հարցերի հանձնաժողովի անդամ Արմեն Խաչատրյանն ասաց, որ իրավապահները պետք է վարույթ սկսեն ու պարզեն, թե ինչ է եղել իրականում. «Չեմ կարող ասել՝ ինչ խնդիր է եղել, ես զանգահարել եմ Տեղ համայնք, ասել են՝ առանձնապես բան չի եղել, վիճաբանություն է եղել»:
Ըստ Արմեն Խաչատրյանի, պաշտպանական հարցերի վերաբերյալ համայնքի բնակիչները բնականաբար կարող են տարբեր կարծիքներ ունենալ. «Քննարկում է եղել, իսկ վիճաբանություն ամեն օր էլ լինում է: Երբ պաշտպանական խնդիր է լինում, գյուղը պետք է ունենա իր ռազմավարական ծրագիրը, ով ինչ պետք է անի: Տեղ համայնքը ամենալավ պատրաստված գյուղն է ՀՀ-ում, բոլորն իրենց տեղը գիտեն, որեւէ բանի խնդիր չունեն: Տեղ համայնքում կա զինանոց, կա ամեն ինչ, գյուղի յուրաքանչյուր տղամարդ գիտի, թե ինքը ինչ է անելու յուրաքանչյուր պատերազմական իրավիճակում: Տեղ համայնքի օրինակը իրականում պետք է վերցնեն մյուս գյուղերը, շատ բարձր պատրաստվածության աստիճան է: Տեղ համայնքում զենքի խնդիր գոյություն չունի, ամեն զենքի վրա կա անուն ազգանուն, թե այդ զենքը ումն է: Բայց այդ զենքը չի տրամադրվում խաղաղ իրավիճակում անիմաստ մեկին, որ զենքը կապի մեջքին գնա խանութ, գա: Գյուղացիներին զենք բաժանված չի, գյուղացին ՀՀ քաղաքացի է, որպես սահմանամերձ գոտի, երբ խնդիր լինի, գյուղացին գիտի զենքը որտեղից է վերցնում, գնալու է պաշտպանի, ասենք՝ հացի արտադրամասը կամ թիկունքային ինչ աշխատանք է անելու»:
Կարդացեք նաև
Տեղ համայնքում անցակետեր տեղադրելու հետ կապված Արմեն Խաչատրյանն ասաց, որ առաջին անգամ է լսում նման բան, բայց Տեղ գյուղից այն գոտի, որտեղ խնդիրներ կան, այնտեղ գնալու համար կա ոստիկանական անցակետ. «Ադրբեջանն ինչ գործ ունի ընդհանրապես խառնվի, թե մենք որտեղ ենք անցակետեր դնում կամ ինչ ենք անում: Նման բան չկա եւ չի էլ կարող լինել»:
Հռիփսիմե ՋԵԲԵՋՅԱՆ
