«Գրիգորի Խաչատուրովն այն գեներալներից է, ով դուրս է եկել անկախ Հայաստանի կրթական-ռազմական ուսումնարաններից և, փաստորեն, Հայաստանի անկախ հանրապետությանը ծնունդ տված գեներալներից մեկն է, կրթություն տված գեներալներից մեկն է։ Խաչատուրովը գիտական ռազմարվեստի գիտակ է»,- այսօր, երրորդ բանակային կորպուսի նախկին հրամանատար, մարտի 16-ից կալանքի տակ գտնվող գեներալ-մայոր Գրիգորի Խաչատուրովի հանրային աջակցության խմբի հրավիրած մամուլի ասուլիսի ժամանակ, կարծիք հայտնեց թուրքագետ Ռուբեն Մելքոնյանը։
«Խոսքը մի գեներալի մասին է, որը ունի ռազմարվեստի բոլոր հմտությունները, տիրապետում է դրան գիտական առումով և դա կիրառել է պրակտիկայում՝ լինելով հաղթած գեներալ։ Խաչատուրովը համեստ գեներալ է, նման է այն բոլոր մեր իմացած ու չիմացած հերոսներին, որոնք երբևէ իրենց կուրծքը չեն ծեծել ինչ-որ քայլի, արարքի, հերոսության համար։ Նա հերոս, բայց համեստ գեներալ է և արժանի է, որպեսզի հասարակությունն ու սերունդները ճանաչեն որպես սիմվոլի, որը հայկական ռազմարվեստի և հայկական բանակի բոլոր դրական տրադիցիաները իր մեջ է ներառում»,- հավելեց Ռուբեն Մելքոնյանը՝ ընդգծելով, որ սիմվոլների պատերազմում, երբ թշնամին իր համար նոր սիմվոլներ է ստեղծում, Հայաստանի իշխանությունները հեռացնում են մեր սիմվոլներին՝ նրանց մեղադրելով տարատեսակ, չհիմնավորված մեղքերում:
«Ստեղծվել է մի այնպիսի բարոյական մթնոլորտ, որ հեկտարներով հողեր հանձնածները մեղադրում են հեկտարներով հողեր ազատագրածներին։ Սա իրոք համազգային աղետ է, որ մենք ապրում ենք աննման «արժեքների» շրջանակում»,- կարծում է Ռուբեն Մելքոնյանը։
Նախաձեռնող խմբի անդամ «Որդիների կանչ» ՀԿ նախագահ Արա Ռոստոմյանն էլ իր խոսքում ասաց՝ Գրիգորի Խաչատուրովի կալանավորումը հուշում էր այն մասին, որ սպասվում են նոր տարածքների զիջում և նոր զոհեր. «Իմանալով, որ Խաչատուրովը այն եզակի հրամանատարներից մեկն է, որ ինքը հանգիստ չի կարող նայել, թե ինչպե՞ս է բզկտվում հայրենիքը, ինչպե՞ս են զոհվում անմեղ տղաները, Նիկոլը՝ վախից ելնելով, իրեն փակի տակ է պահում, որ Խաչատուրովը իր շուրջը չկոնսոլիդացնի այն առողջ ուժերը, որոնք դուրս կգան հայրենիքը պաշտպանելու և, ինչու չէ, նաև օրվա իշխանությանը վռնդելու»:
Կարդացեք նաև
Նելլի ԳՐԻԳՈՐՅԱՆ
